Nurlan Noǵaev: Ákimdikter halyqtyń ómirin jaqsartý úshin barynsha eńbektenýi tıis
Atyraý oblysy óńirlik kommýnıkatsııalar qyzmetiniń habarlaýynsha, Azǵyr óńirine saparynyń ekinshi kúni Nurlan Noǵaev birqatar áleýmettik obektilerdi aralap, Asan, Qońyrterek, Qoıandy, Jalǵyzapan jáne Batyrbek aýyldarynda jergilikti turǵyndarmen kezdesti. Óńir basshysy shalǵaıdaǵy eldi mekenderdi aýyz sýmen qamtamasyz etý - jergilikti atqarýshy organdardyń aldynda turǵan birinshi kezektegi mindet ekenin basa aıtyp, jeke toqtaldy.
«Bizdiń mindetimiz - turǵyndardyń ómirin jaqsartý úshin barlyq jaǵdaıdy jasaý, qolda bar barlyq quraldardy paıdalaný. Bul protseske barlyq memlekettik organdar qyzmetkerleri, qoǵamdyq ınstıtýttar, barlyq deńgeıdegi máslıhattar tartylýy tıis. Ákimdikter jergilikti jerlerde bizge jobalardy usynýy tıis. Jergilikti turǵyndardyń úmit-armanyn, qandaı da bir eldi mekendi jaqsartý úshin neniń jetispeıtinin bárinen buryn sizder jaqsy bilesizder. Ókinishke qaraı, keı aýdandarda jumystyń bul tetigi tolyq iske aspaıdy. Ákimder, depýtattar, qoǵam qaıratkerleri osy iske qatysýy tıis. Jaqsy jobalarǵa biz barlyq ýaqytta qarajat tabamyz. Sizderdiń mindet - ony jetkizý», - dedi N. Noǵaev.
Azǵyr óńiriniń turǵyndaryn 2020 jylǵa deıin óńirlerdi damytý baǵdarlamasy aıasynda sapaly aýyz sýmen qamtamasyz etý úshin sýmen jabdyqtaý obektilerin rekonstrýktsııalaý, qurylysyn salý jáne jańǵyrtý boıynsha sharalar qabyldanýda.
Sondaı-aq, olardyń qataryna qazirgi ýaqytta Qoıandy toptyq sý qubyry arqyly aýyz sýmen qamtylyp otyrǵan Azǵyr óńiriniń 7 eldi mekeni kiredi (Azǵyr, Balqudyq, Batyrbek, Súıindik, Jalǵyzapan, Qońyrterek, Eginqudyq). Asan, Úshtaǵan eldi mekenderine aýyz sý jetkizý úshin jobalyq-smetalyq qujattama jasalyp jatyr. Qoshalaq jáne Nıetbaı aýyldary jer asty sýyn paıdalanyp, aýyz sýmen qamtamasyz etilýde.
