Nurlan Nyǵmatýlınniń uly reıderlikpen aınalysty degen kúdikke ilindi – QMA

ASTANA. KAZINFORM — Burynǵy Májilis spıkeri Nurlan Nyǵmatýlınniń uly Nurjan Nurlanov reıderlik jasaý kúdigine ilindi. Bul aqparatty Qarjylyq monıtorıng agenttiginiń resmı ókili rastady. 

— Almaty qalasy boıynsha Ekonomıkalyq tergep-tekserý departamenti reıderlik faktisi boıynsha qylmystyq isti tergep jatqanyn rastaımyz, — dep jaýap berdi Qarjylyq monıtorıng agenttiginiń resmı ókili Ernar Taıjan agenttik tilshisine.

Sondaı-aq, resmı ókil Qylmystyq-protsestik kodekstiń 201-babyna sáıkes atalǵan jaıtqa qatysty ózge aqparat jarııa etýge jatpaıtynyn eskertti.

Eske salaıyq, bıyl 3 naýryzda elimizdiń prokýratýra organdary burynǵy Májilis spıkeri Nurlan Nyǵmatýlınniń aǵasy Arǵyn Nyǵmatýlınge izdeý jarııalady. 

Keıin Prokýratýra organdarynyń bastama jasaýymen Sybaılas jemqorlyqqa qarsy is-qımyl agenttigi izdeý jarııalaǵan A. Nyǵmatýlınniń ústinen qandaı bap boıynsha is qozǵalǵany málim boldy. 

Sondaı-aq Arǵyn Nyǵmatýlınniń Qazaqstannan tergeý bastalǵanǵa deıin ketkeni belgili boldy.