Nurlan Másimovtiń isi Prokýratýraǵa keri qaıtaryldy

ASTANA. QazAqparat – Pavlodar oblysy polıtsııa departamentiniń burynǵy basshysy Nurlan Másimovtiń ústinen qozǵalǵan qylmystyq is boıynsha alǵashqy sot otyrysy ótti, dep habarlaıdy QazAqparat tilshisi atalǵan óńir sotynyń baspasóz qyzmetine silteme jasap.

«Atalǵan is boıynsha qylmystyq is júrgizý zańnamasy aıtarlyqtaı buzylǵan. Atap aıtqanda, iske qatysy barlardyń rólin sıpattaýda oryndaýshy men uıymdastyrýshynyń róli naqtylanbaǵan. Aıyptalýshylar M., S. jáne E-niń qandaı qylmystyq áreketterdiń nátıjesinde memleketke zalal keltirgeni belgisiz. Sondaı-aq, aıyptaý aktisinde qarjynyń qandaı somada jymqyrylǵany jáne qansha shyǵyn kelgeni kórsetilmegen», - deıdi oblystyq sottan.

Odan bólek, resmı habarlamada joǵaryda atalǵan zańǵa sáıkes kelmeıtin áreketter negizgi sot talqylaýyn taǵaıyndaýǵa múmkindik bermeıtini aıtylǵan.

«Qylmystyq is júrgizý kodeksiniń 323-babyna sáıkes negizgi sotty taǵaıyndaýǵa kedergi keltiretin qylmystyq is júrgizý zańnamasynyń buzylýyn joıý úshin is Pavlodar oblysynyń prokýroryna keri qaıtaryldy», - delingen alǵashqy sot qorytyndysynda.

Aıta keteıik, keshe Pavlodarda burynǵy polıtsııa basshysy Nurlan Másimovtiń soty bastalǵan edi.

Eske salsaq, byltyr 17 qańtarda Pavlodar oblysy polıtsııa departamentiniń basshysy Nurlan Másimov qyzmetinen bosatylǵan edi.

Sol jyly maýsymda Pavlodar oblystyq Polıtsııa departamentiniń burynǵy bastyǵy Nurlan Másimovke izdeý jarııalanǵan bolatyn. Oǵan asa aýyr sybaılas jemqorlyq qylmys jasady degen aıyp taǵyldy.

Keıin izdeý jarııalanǵan Nurlan Másimov týraly aqparat bergen adamǵa 12 mln teńgege deıin syıaqy beriletini habarlandy.

2022 jyly 13 shilde de QR Ultyq qaýipsizdik komıtetiniń ókilderi Nurlan Másimovti Reseımen shekarada ustady.

Foto: gov.kz