Nurlan Qalqa: Ulttyq rýhanı baılyǵymyz - ulttyq jańǵyrýymyzdyń bastaý-bulaǵy
ASTANA. QazAqparat - Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasy elimizdiń aldaǵy rýhanı ósip-órkendeýi men áleýmettik damýynyń tujyrymdamasy degen bolar edim. Dál qazirgi ýaqytta memlekettiń ıdeologııalyq baǵyt-baǵdary, mádenı damýy, rýhanı keńistik osyndaı ómirsheń baǵdarlamany qajetsinip otyrǵanyn aıtý lázim. Elbasy maqalasyna oraı aqyn Nurlan Qalqa osyndaı pikir bildirdi.
«Maqaladaǵy «Ulttyq salt-dástúrlerimiz, tilimiz ben mýzykamyz, ádebıetimiz, joralǵylarymyz, bir sózben aıtqanda ulttyq rýhymyz boıymyzda máńgi qalýǵa tıis» degen sóılemder kez kelgen ult janashyrynyń, oqyrmandardyń kókeıindegini tap basyp, kókirek kózin asha túsetini sózsiz. Ásirese, búginderi din máselesinde túrli aǵymdarǵa ilesip, salt-dástúr, ádet-ǵuryp, babalar jolyn mansuq etip júrgen keıbir jastarymyzǵa úlken sabaq, maǵynaly da mándi keńes bolatynyn basa aıtpaqpyn», - deıdi ol.
«El Prezıdenti N.Á. Nazarbaevtyń «Men halqymnyń taǵylymy mol tarıhy men yqylym zamannan arqaýy úzilmegen ulttyq salt-dástúrlerin aldaǵy órkendeýdiń berik dińi ete otyryp, árbir qadamyn nyq basýyn, bolashaqqa senimmen bet alýyn qalaımyn» degen úlken júreginen shyqqan júrekjardy sózin tolǵanbaı, tebirenbeı oqý múmkin emes. Bala kezimizde aq saqaldy ata, aq jaýlyqty ájeniń aldynan júgirip shyǵyp, amandasqanymyzda nemese aýyl arasynda jıi bolatyn túrli ulttyq merekelermen quttyqtaǵan kezimizde mańdaıymyzdan súıip, «órkenniń óssin, balam!», «úlken azamat bol!», «kósegeń kógersin!» dep batalaryn berýshi edi. Sol dástúrden jańylmaı, úılengen kezimizde de úlkender ulttyq joralǵylaryn jasap jatatynyn qalaı umytarmyz. Sonyń bári teris aǵym jeteginde adasyp júrgen búgingi jastarǵa túrpideı kórinetinin qaıtersiń», - dep atap ótti Nurlan Qalqa.
Onyń pikirinshe, sondaı solshyl nıettegi jasandylyqtarǵa Elbasy toqtaý aıtyp, jańasha jol nusqap, jańǵyrýdyń jańa baǵytyn belgilep berdi. Aqyn maqalada aıtylǵan ıdeıalardy el bolyp qoldaýǵa shaqyrady.
«Jas býyn ókilderi halyqtyq ıgi dástúrden tálim alyp, eljandylyq, patrıottyq qasıetterdi boıyna sińirip ósýi úshin naq osyndaı baǵdardyń mańyzdylyǵy zor. Biz Elbasy maqalasyn oqyp, osyndaı tereń oı túıdik», - dedi N.Qalqa.
