Nurlan ımam TikTok-ta dem salatyndardy synady

ASTANA. KAZINFORM — «Yryskeldi qajy» meshitiniń Bas ımamy Nurlan qajy Baıjigituly BIZDIÑ ORTA podkastinde qazaqstandyqtardy qashyqtan dem salǵyzýdan aýlaq bolýǵa shaqyrdy.

— Men dem salýdyń zamanaýı túrin kórdim. Ol túrinde TikTok arqyly salady eken. Qalaı dese, «Telefonnyń ekranyn jaqyn» usta deıdi. Sonda ekranǵa úrlegen kezde demi aýyryp turǵan búıregine tıedi. Ne degen KT-apparat (kompıýterlik-tomografııalyq apparat) ekenin qaıdan bileıin. Munyń bári jaı nárse, halqymyzǵa aldanbaý kerek, — dedi ol.

Sondaı-aq, ol áleýmettik jeli arqyly dinı kontentti aqylmen tutyný mańyzdy ekenin aıtty. 

— Duǵa qylý degen bar. «Maǵan duǵa qylyp qoıyńyz» dep jatady. Ol — jaqsy nárse. Al endi mıkrofon arqyly dem salyp, ekrannyń ar jaǵynan, YouTube arqyly duǵa darytý degen endi… Men ózim kórdim. Dúkenge kirip barsam, satýshy kózime birden túspedi. Qurannyń daýsy shyǵyp tur. Satýshy shyqqanda nege quran qosqanyn surasam, «Tazartyp jatyrmyz» deıdi. «YouTube arqyly tazalanbaıdy» dedim. YouTube-ten tamaq ishkendi kórseń, qarnyń toıyp qala ma? Bul da sol sııaqty. Ondaı nársege ılanbaýymyz kerek, — dedi Nurlan qajy.

Buǵan deıin Nurlan ımam «ataqty ánshi bolsyn» dep balanyń aýzyna túkirtý durys pa degen saýalǵa jaýap berdi.