Nurlan ımam orazanyń birinshi kúninde Jibek Joly efırine shyqty
Jarty saǵattyq efır barysynda kórermennen qalalyq, uıaly telefon jáne áleýmettik jeliler arqyly 1 myńnan asa suraq kelip tústi.
Olarǵa Nurlan ımam tolyqqandy jaýap berýge tyrysty.
Máselen, kórermenniń biri áleýmettik jeli arqyly ımamnan namaz oqymaıtyn adamdardyń oraza ustaýyna qatysty suraq qoıdy.
«Jalpy, halqymyz «musylmandyq áste-áste, dinnen shyǵý bir páste» degen. Adam birte-birte úırenedi. Birinshi ret oraza ustap, alǵa qadam basqan adamǵa «nıetiń qabyl bolsyn!» degen sózdi aıtyp, qoldap-qýattaı bilýimiz kerek. «Seniki qabyl emes» dep artyq-kem sózben pendeshilikke salynatyn kezimiz bar. Oraza ustaǵan adamnyń nıetin qoldasaq, onda ol búgin oraza ustap, erteń qulshylyqqa kele jatar», - dep jaýap berdi Nurlan ımam.
Onyń atap ótýinshe, halqymyzda keshki aýyzashar kezinde dáret alý arqyly aýyz ashý dástúri qalyptasqan. Biraq, bul mindetti emes.
Dáret almaı-aq aýyz asha berýge bolady. Dáret alý namaz ben Quran ustaǵan kezde ǵana mindetti.
«Orazanyń birinshi sharty – nıet. Sondyqtan nıeti durys bolǵanda ǵana oraza durys dep sanalady. Al aryqtaý, densaýlyqty kútý úshin oraza ustasa, onda ol keıingi orynǵa syrǵıdy. Birinshi orynda qulshylyq nıeti turýy tıis», - dedi din mamany.
Sondaı-aq ol «Oraza ýaqytynda bilmestikpen dám tatyp qoısa, baıqaýsyzda balaǵat sóz aıtsa, oraza buzyla ma?» degen saýalǵa jaýap berdi.
«Balaǵat sózderden oraza buzylmaıdy. Biraq, musylman adam buzylmaıdy eken dep boǵaýyz, beıpil sózderdi sóılemeýi kerek. Qanshalyqty boǵaýyz ne beıpil sózderdi kóp aıtsańyz, bireý kórmeı tur dep beıádep oǵash qylyqtar jasaıtyn bolsańyz, orazanyń saýaby kemı beredi. Eń sońynda orazańyzdan tek ashtyq qalady. Allanyń aldyna baryp, «mynaý meniń orazam» degende eshqandaı saýaby bolmaıdy. Tek ashtyqpen ótken ýaqyt bolyp sanalady», - dedi Nurlan ımam.
Aıta keteıik, efır aıaqtalǵannan keıin de kórermen tarapynan dintanýshyǵa 800-ge jýyq suraq joldandy.
