Nurlan Ermekbaev zııaly qaýym ókilderimen Joldaýdyń basym baǵyttaryn talqylady
Kezdesý barysynda Nurlan Ermekbaev Memleket basshysy Nursultan Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Qazaqstan halqyna Joldaýynyń negizgi baǵyttary jaıynda habardar etti, dep habarlaıdy mınıstrliktiń baspasóz qyzmeti.
Mınıstrdiń aıtýynsha, Joldaýda álemdik ekonomıkanyń erekshelikterine elimizdiń tabysty beıimdelýi úshin 2018 jyly sheshilýi qajet naqty mindetter qoıylǵan. Onyń ishinde, jańa tehnologııalardy, ekonomıkalyq áleýetti jáne ınfraqurylymdy, memlekettik basqarý jáne adamı kapıtalyn damytý salasynda 10 mindet belgilengen.
Mınıstr din salasyndaǵy memlekettik saıasattyń, azamattyq qoǵam jáne jastar saıasaty salalarynyń negizgi basymdyqtary jaıly aıtty.
«Din salasyndaǵy memlekettik saıasattyń sharalary kelesi basymdyqtarǵa baǵyttalǵan. Birinshiden, azamattardyń quqyqtary men bostandyqtaryn saqtaýda dindi destrýktıvti maqsattarda paıdalanýǵa jol bermeý. Ekinshiden, dinı qatynastarda zańdy jumys jasaıtyn sýbektilerdiń múddelerin qorǵaý. Úshinshiden, kópetnosty memlekettegi tynyshtyqtyń kepili bolyp tabylatyn memlekettiń zaıyrly negizderin saqtaý», - dep atap ótti N. Ermekbaev.
Din isteri jáne azamattyq qoǵam mınıstri din máseleleri týraly zań jobasynyń keıbir mańyzdy erejelerine toqtalyp ótti.
«Memlekettik qyzmetshilerge qyzmet babyn óziniń nemese basqalardyń dinı múddelerine paıdalanýǵa jol bermeý jónindegi talaptar naqtylanýda. Jobamen buǵan deıin onsyz da memlekettik qyzmetshilerdiń ádep kodeksinde qarastyrylǵan tek úsh shekteý ǵana engiziledi. Alaıda bul shekteýler memlekettik qyzmetke kirýge, Qudaıǵa sený nemese meshitke, shirkeýge barý quqyǵyna áser etpeıdi», - dep túsindirdi N. Ermekbaev.
Azamattyq qoǵammen is-qımyl salasynda «Kommertsııalyq emes uıymdardyń qyzmeti týraly zańnamalyq aktilerge ózgerister engizý týraly» zań jobasy daıyndaldy. Zań jobasynyń maqsaty - memlekettik áleýmettik tapsyrysty barynsha sapaly jáne tıimdi etý.
Nurlan Ermekbaev túrli óńirler men aýyldyq jerlerdegi úkimettik emes uıymdardy, jastar uıymdary men dinı qyzmetkerlerdi qoldaý maqsatynda jańa jobalar júzege asyrylyp jatqandyǵyn atap ótti.
«Máselen, Mınıstrlik Qazaqstan musylmandary dinı basqarmasymen birlesip, ótken jyly «Ýaqyp» qaıyrylymdylyq qoryn qurdy. Qor shalǵaı eldi mekenderde turatyn jáne materıaldyq turǵyda kómekke zárý 300-den astam dinı qyzmetkerge kómek kórsetip úlgerdi. «Ýaqyp» qory Aqtóbe turǵyndarynyń áleýmettik osal toptary úshin arnaıy salynyp jatqan 4 qabatty turǵyn úı qurylysyna qoldaý kórsetýde. Sondaı-aq, qaıyrymdylyq qory osy aıda Almaty oblysynyń Túrgen aýylynda órtenip ketken pravoslav shirkeýin qalpyna keltirý jumystary úshin qarjy bóldi. Bul Qor tarapynan kórsetiletin kómektiń az ǵana bóligi», - dep atap ótti N. Ermekbaev.
Mınıstr Qostanaı oblysy qoǵamdyq keńesteriniń belsendi jumysyn erekshe atap ótti.
«Qostanaılyqtar qoǵamdyq keńesterdiń jumysyndaǵy ózekti máselelerdi sheshý úshin kóptegen usynystar bildirip jatyr jáne bizdiń semınarlarymyzǵa turaqty túrde qatysyp otyrady... Osy turǵyda avstrııalyq fılosof Pol Karl Feıerabendtiń: «Azamattyq qyzmet - bul qoǵamdaǵy erkin azamattardyń eń úzdik jáne jalǵyz mektebi» -degen sózin atap ótkim keledi»- dedi Nurlan Ermekbaev.
Joldaýdy júzege asyrý sheńberinde Din isteri jáne azamattyq qoǵam mınıstrligi elimizdiń belsendi azamattarymen birlesip «Rýhanı jańǵyrý» aıasynda «Atameken» shaǵyn baǵdarlamasyn iske asyrýda.
N. Ermekbaevtyń aıtýynsha, Qostanaı oblysynyń kásipkerleri bul baǵdarlamany iske asyrýǵa belsendi qatysýda. Óńir kásipkerleri Zatobolsk eldi mekeninde jalpy quny 38 mln teńgeni quraıtyn qarjyǵa turǵyn úıler aýlalaryn jańartyp, abattandyrý jumystaryn júrgizgen. Qamysty aýdanyndaǵy Qarabatyr aýylynyń turǵyny M.Qudaıqulov aýyldyq mádenıet úıiniń ǵımaratyn jóndeýden ótkizdi, al Sarykól aýylynda kásipkerler esebinen sport zal kesheni qalpyna keltirilgen.
Jastar saıasaty salasynda «Bolashaqqa baǵdar: rýhanı jańǵyrý;» baǵdarlamalyq maqalasynyń sheńberinde memlekettik jastar saıasaty Tujyrymdamasyn júzege asyrý jónindegi jospar jańartyldy. Josparǵa engen is-sharalarda jumyspen qamtý, otbasylyq qundylyqtardy damytý, jastar uıymdaryn qoldaý, kásipkerlik pen eriktiler qyzmeti júıelelerin jetildirý máseleleri eskerilgen.
Jumys sapary barysynda Din isteri jáne azamattyq qoǵam mınıstri Qostanaı oblysynyń ákimi Arhımed Muhambetovtyń halyq aldyndaǵy eseptik kezdesýine qatysty, sondaı-aq úkimettik emes uıymdardyń resýrstyq ortalyǵyna, «SaryarqaAvtoprom» JShS, Ybyraı Altynsarın memorıaldy keshenine, Shaqshaq Jánibek Qoshqaruly eskertkishine jáne «Aımaǵanbet Qajy Spanuly» atyndaǵy oblystyq meshitke bardy.
