Nurlan Ermekbaev túrik áriptesimen kezdesti
«Jumys kesteńizdiń tyǵyzdyǵyna qaramastan ýaqyt bólip, bizge Qorǵanys mınıstri retinde alǵash ret kelip otyrsyz. Sol úshin rızashylyǵymyzdy bildiremiz. Biz dostastyǵy jarasqan elderimiz arasyndaǵy stretegııalyq áriptestikti nyǵaıtýǵa úles qosyp, ony damytýymyz kerek. Bizdiń jan-jaqty yntymaqtastyqtyǵymyz ben áriptestigimizdiń negizi, árıne, eki memlekettiń kóshbasshylary arasyndaǵy senimdi jáne óte jaqyn dostyq qarym-qatynas sanalady», - dedi kezdesý barysynda Nurlan Ermekbaev.
Óz kezeginde Túrkııa Qorǵanys mınıstri kesheden beri qonaqjaılyq kórsetip jatqan Qazaqstan tarapyna zor rızashylyǵyn bildirip ótti.
«Árıne, atajurtymyzǵa kelý biz úshin óte mańyzdy ári qazaq jerine taban tiregennen keıin-aq ortaq tarıhymyzdyń tamyry qanshalyqty tereńde jatqanyn sezindik. Baýyrlas qazaq elinde bolyp jatqan barlyq oqıǵalardy jiti baqylap otyrmyz. Ortaq tarıhymyz, ortaq mádenıetimiz jáne bizderdi jaqyndastyra túsetin dúnıeler óte mańyzdy. Baýyrlas elderdiń kóshbasshylary arasyndaǵy baılanystar jumysymyzdyń jemisti bolýyna septigin tıgizip otyr. Áskerı saladaǵy yntymaqtastyǵymyz odan ary nyǵaıa túsetindigine senimim mol», - dedi Hýlýsı Akar.
QR Qorǵanys mınıstri túrik áriptesimen osydan 2 jyl buryn Elbasy Nursultan Nazarbaevtyń Túrkııaǵa sapary barysynda Ankara qalasynda kezdeskenderin jáne sol kezde mańyzdy qujattarǵa qol qoıǵandaryn eske salyp ótti.
«Atap aıtqanda, áskerı saladaǵy yntymaqtastyq týraly jáne qupııa málimetterdi saqtaý týraly kelisimdi rásimdedik. Bul sapar ekijaqty jáne kópjaqty yntymaqtastyqty nyǵaıtýǵa jaqsy serpin berdi. Al joǵary deńgeıdegi strategııalyq keńes - bul yntymaqtastyqtyń negizgi baǵyttaryn aıqyndaıtyn negizgi qural bolyp sanalatyndyǵyn atap ótkim keledi. Qazaqstan men Túrkııa arasynda ekijaqty syndarly dıalogpen qatar kópjaqty yntymaqtastyq ta qarqyndy damyp keledi. Bizdiń elderimiz BUU, IYU, EQYU, AÓІSShK aıasynda belsendi túrde yntymaqtastyqty damytý ústinde. Eki eldiń bastamasymen túrki tildes memleketterdi jaqyndastyratyn óte mańyzdy saıası jáne mádenı uıym - Túrki keńes quryldy», - dedi Nurlan Ermekbaev.
