Nurlan Ermekbaev Qorǵanys mınıstri laýazymyndaǵy mindeti týraly aıtyp berdi

ASTANA. QazAqparat - Qorǵanys mınıstrliginiń basshylyǵyna jaqynda ǵana kelgen Nurlan Ermekbaev atalmysh laýazymda qandaı sharýalardy atqaratyny týraly aıtyp berdi, dep habarlaıdy QazAqparat tilshisi.

«Men azamattyq qorǵanys mınıstrimin, áskerı kıimdi áskerı jattyǵý kezinde kıemin. Bul óte jaýapty ári salmaqty qyzmet. Daıarlyqtyń deńgeıi joǵary. Ony ary qaraı damytatyn bolamyz. Materıaldyq-tehnıkalyq qamtamasyz etý turǵysynan sheshilmegen máseleler bar. Jalpy, Qarýly Kúshterdiń daıarlyǵy men jumysy óte durys jolǵa qoıylǵan. Ol sátti damyp keledi. Atalmysh jumysty jalǵastyratyn bolamyz. Sabaqtastyq qaǵıdaty saqtalady. Bastalǵan is jalǵasyn tabady», - dedi Úkimet otyrysynan keıin tilshilerdiń suraǵyna jaýap bergen mınıstr.

Jańa mınıstr sonymen birge, qazaqstandyq armııadaǵy álimjettik týraly da oıymen bólisti.

«Qarýly Kúshterdegi álimjettik sırek kezdesedi. Burynǵy ýaqyttan jáne basqa elderden qaraǵanda sırek. Tárbıe jumysy burynǵysha jalǵasyn taýyp, jarǵydan tys qarym-qatynastar  az», - deıdi ol.

Eske sala ketsek, Memleket basshysynyń Jarlyǵymen Nurlan Baıuzaquly Ermekbaev Qazaqstan Respýblıkasynyń Qorǵanys mınıstri bolyp taǵaıyndalǵan bolatyn.