Nurlan Ermekbaev Egıpette ustalǵan stýdentterge qatysty pikir bildirdi

ASTANA. QazAqparat - QR Din isteri jáne azamattyq qoǵam mınıstri Nurlan Ermekbaev dinı bilim alý úshin resmı joldamasyz shetelge attanbaýǵa keńes berdi, dep habarlaıdy «QazAqparat» HAA tilshisi.

«Egıpettegi qazaqstandyq stýdentterdiń keleńsiz oqıǵasy ońynan sheshildi, biz oǵan qýanyshtymyz. Sońǵy kezderi jastardyń eshqandaı resmı joldamasyz kýrstarǵa oqýǵa baryp, keleńsizdikterge tap bolýy jıilep ketti. Sondyqtan, Qazaqstan musylmandary Dinı basqarmasymen birlesip, dinı bilim alý úshin shet memleketterge óz betimen barmaýǵa keńes beremiz», - dedi N.Ermekbaev.

Sonymen birge, mınıstr shette alǵan dinı bilimniń Qazaqstanda jaramaı qalýy yqtımaldyǵyn jáne shetelge bilim alýǵa ketken jastardyń úlken qaterge bas tigip otyrǵandaryn basa aıtty.

«QMDB qatysýynsyz alǵan dinı bilimmen úmitkerler QMDB júıesine jumysqa ornalasa almaıdy. Ózderi úshin bilim alýǵa baratyn adamdar qandaı qaterge bas tigip otyrǵandaryn túsinýi qajet. Bul másele dinı bilim alatyndarǵa ǵana qatysty emes. Búginde myńdaǵan qazaqstandyq stýdentter shet memleketterde túrli mamandyqtar boıynsha bilim alýda. Olar da qylmystyq toptardyń, dinı radıkaldardyń qurbanyna aınalýy múmin. Bul bárimizge ortaq problema», - dep tolyqtyrdy mınıstr.

Mınıstrlik usynǵan derekterge sáıkes, qazirgi ýaqytta 300-ge jýyq qazaqstandyq ózge memleketterde dinı bilim alyp jatyr. Olardyń bir bóligi QMDB joldamasymen ketken.

Eske sala ketsek, 20 shildege qaraǵan túni Egıpettiń arnaıy qyzmeti til kýrsyna ketken 6 qazaqstandyq stýdentti ustady. 1 tamyz kúni keshkisin Egıpettiń Ulttyq qaýipsizdik komıtetiniń ókilderi Qazaqstannyń elshiligimen habarlasyp, osyǵan deıin ustalǵan qazaqstandyq azamattardyń barlyǵyn eline deportatsııalaıtyndaryn habarlady. Qazaqstandyqtardy ustaý sebepteri ázirge belgisiz.