Nurlan Ermekbaev: Bizdiń ortaq mindetimiz – el tynyshtyǵyn saqtap, bolashaq urpaqqa beıbit ómir syılaý

NUR-SULTAN. QazAqparat – Qazaqstannyń Qorǵanys mınıstri, general-leıtenant Nurlan Ermekbaev áskerı qyzmetshiler men ardagerlerge Otan qorǵaýshy kúnine arnap beınequttyqtaý joldady, dep habarlaıdy QazAqparat.

Bıyl Qazaqstannyń Qarýly Kúshterine 29 jyl tolmaq. Osy ýaqyt ishinde el áskeri memlekettiń egemendigi men aýmaqtyq tutastyǵynyń kepili, senim artar tiregi boldy.

– Sizderdiń áskerı boryshqa berik, antqa adal bolý qasıetińizdiń arqasynda el irgesi bútin, aspany ashyq, halqymyz beıbit ómir súrýde, - dedi mınıstr áriptesteri men qyzmettesterine.

General-leıtenant Nurlan Ermekbaev Qarýly Kúshterdiń Joǵarǵy Bas qolbasshysy Qasym-Jomart Kemeluly Toqaevtyń eldiń qorǵanys qabileti men armııanyń jaýyngerlik qýatyn nyǵaıtýǵa baǵyttalǵan tapsyrmalarynyń Tuńǵysh Prezıdent salǵan sara jolmen sabaqtastyǵyn atap ótti.

– Qazaqstan jaýyngerleri adamzat tarıhyndaǵy eń alapat soǵysta 76 jyl buryn bostandyq pen táýelsizdikti qorǵaǵan ata-babalarymyzdyń jaýyngerlik dástúrin abyroımen jalǵastyrýda, – dedi qorǵanys vedomstvosynyń basshysy.

Nurlan Ermekbaev Ekinshi dúnıejúzilik soǵystaǵy ata-babamyzdyń erlikke toly dara joly óskeleń urpaq úshin taǵylymy mol úlgi-ónege ekenin aıtyp ótti.

-Bizdiń ortaq mindetimiz – surapyl soǵystyń bolýyna jol bermeı, elimizdiń tynyshtyǵyn saqtap, bolashaq urpaqqa beıbit ómir syılaý, - dedi Qorǵanys mınıstri Nurlan Ermekbaev.

Sóz sońynda qorǵanys vedomstvosynyń basshysy qan maıdandaǵy shaıqasta Jeńis týyn jelbiretken, tyldaǵy qajyrly eńbegimen Jeńisti jaqyndatqan qadirli ardagerlerdi, beıbit ómirde el tynyshtyǵyn qorǵaýda turǵan jaýyngerlerdi quttyqtady.

Qorǵanys mınıstri Nurlan Ermekbaev barshaǵa zor densaýlyq, ár otbasyna amandyq, qasıetti Otanymyz – Qazaqstannyń aıbynyn asqaqtatyp, ony qorǵaý jolyndaǵy abyroıly iste tolaǵaı tabys tiledi.