Nurlan Ermekbaev: Bitimgerler sanyna emes, sapaǵa ekpin qoıamyz

NUR-SULTAN. QazAqparat - Búginde bitimgerlik sharalarǵa joǵary bilikti áskerı qyzmetshiler baǵyttalady. Búgin elordada BUU-nyń besinshi sımpozıýmy aıasynda ótken brıfıngte QR Qorǵanys mınıstri Nurlan Ermekbaev málim etti, dep habarlaıdy QazAqparat tilshisi.

«BUU sımpozıýmy mańyzdy halyqaralyq shara bolyp sanalady. Bul óz kezeginde Qazaqstan BUU tarapynan belsendi bitimger memleket retinde moıyndalǵanyn, sondaı-aq BUU-nyń jalpy bitimgerlik kúsh-jigerinde bizdiń eldiń tabysty qyzmetin bildiredi. Jaqynda QR Qorǵanys mınıstrliginiń keńeıtilgen alqa májilisinde Prezıdent Qasym-Jomart Toqaev QR Qarýly Kúshterine bitimgershilik qyzmetti keńeıtý kerektigin atap ótken bolatyn. Sımpozıým aıasynda talqylaý men kelissózder barysynda BUU basshylyǵy jáne birqatar elderden kelgen qatysýshylar búginde álem ózgeriske ushyraǵanyn, qaýip-qater men táýekelderdiń jańa sıpattary paıda bolǵanyn rastady», - dedi N. Ermekbaev.

Vedomstvo basshysynyń sózine qaraǵanda, qazirgi kezde áskerı bólimshelermen qatar, mamandandyrylǵan ári joǵary bilikti shaǵyn áskerıler komandalary aıryqsha suranysqa ıe bolyp otyr. Bul qyzmetshiler shet tilderin erkin meńgerip, ahýaldy turaqtandyrýǵa yqpal ete alatyn daǵdylardy ıgerýi tıis.

«Sondyqtan da biz osy baǵytta jumys isteıtin bolamyz, ıaǵnı ekpindi bitimgerler sanyna emes, sapaǵa qoıamyz. Bul turǵyda BUU qoldaýyna úmittenemiz. Sonymen qatar, bitimgershilik boıynsha BUU-men yntymaqtastyq kez kelgen el úshin paıdaly, sebebi bitimgershilik bólimshelerdiń kásibı, zııatkerlik jáne tehnologııalyq áleýetin kóterýge múmkindik beredi. Sáıkesinshe, bul qadamdar barsha Qarýly Kúshterdiń áleýetine de áser etedi. Atap aıtqanda, búginde Batys Sahara men Lıvanda qyzmet etip júrgen bizdiń bitimgershilerdiń biliktiligine aıtarlyqtaı jaqsy baǵa berilip otyr», - dedi mınıstr.

Budan buryn habarlanǵandaı, búgin elordada bitimgershilik úshin tehnologııalardaǵy seriktestik boıynsha BUU-nyń besinshi sımpozıýmy bastaldy.