Nurlan Ermekbaev: «ASAR» forýmy jyl saıyn elimizdiń túrli óńirlerinde ótkiziletin bolady

ASTANA. QazAqparat - «ASAR» ÚEU-bıznes-memleket úshjaqty yntymaqtastyq forýmy jyl saıyn respýblıkanyń túrli óńirlerinde ótkiziledi. Bul týraly Qazaqstan Respýblıkasy Din isteri jáne azamattyq qoǵam mınıstri Nurlan Ermekbaev Atyraý qalasyndaǵy forým barysynda málimdedi.

«ÚEU-bıznes-memleket: yntymaqtastyqtyń jańa kókjıekteri» plenarlyq sessııasynda sóılegen sózinde mınıstr Ermekbaev «ASAR» forýmy«Rýhanı jańǵyrý» baǵdarlamasynyń aıasynda ótkizilip otyrǵanyn eske saldy.

«Elbasy óziniń baǵdarlamalyq maqalasynda «Patrıotızm kindik qanyń tamǵan jerińe, ósken aýylyńa, qalań men óńirińe, ıaǵnı týǵan jerińe degen súıispenshilikten bastalady» degen oıdy aıta otyryp, «Týǵan jer» baǵdarlamasyn qolǵa alýdy usyndy. Osyǵan oraı, Din isteri jáne azamattyq qoǵam mınıstrligi «Rýhanı jańǵyrý» baǵdarlamasynyń «Týǵan jer» arnaıy jobasy aıasynda «Atameken» kishi baǵdarlamasyn iske asyrýda. Búgingi is-shara osy baǵdarlamasynyń aıasynda ótkizilýde», - dep baıandady mınıstr.
 

Sonymen birge, mınıstr «ASAR» dıalogtyq alańyn ótkizý memleket, ÚEU men bıznestiń úshjaqty yntymaqtastyǵyn damytý boıynsha júıeli jumysty qurýǵa múmkindik beredi dep atap ótti. Alań turaqty seriktestiktiń irgetasyn qalap, áleýmettik máselelerdi sheshýge azamattyq qoǵamdy belsendirýdiń serpilisin kúsheıtedi.

«Úshjaqty yntymaqtastyqty damytý boıynsha jańa ıdeıalardy, ınnovatsııalardy túrlendirý úshin «ASAR» forýmy elimizdiń ár túrli óńirlerinde jyl saıyn ótkiziletin bolady», - dep basa aıtty Nurlan Ermekbaev.
 

Eske sala keteıik, Atyraýda «ASAR» ÚEU-bıznes-memleket úshjaqty yntymaqtastyq Birinshi Respýblıkalyq forýmy ótýde . Іs-sharanyń uıymdastyrýshylary - QR Din isteri jáne azamattyq qoǵam mınıstrligi, «Atameken» QR Ulttyq kásipkerler palatasy jáne Atyraý oblysynyń ákimdigi.