Nurlan Dýlatbekov: Parlamenttiń aldynda aýqymdy mindetter tur

NUR-SULTAN. QazAqparat – Parlament Májilisiniń depýtaty Nurlan Dýlatbekov Prezıdent Joldaýyna qatysty pikir bildirip, endigi kezekte Parlament qalaı jumys júrgizetinine qatysty oıyn aıtty, dep habarlaıdy QazAqparat tilshisi.

«Meniń oıymsha, búgingi Joldaýda eldegi eń ózekti máselelerdiń bári qamtyldy. ıAǵnı, Prezıdent jaǵdaıdy baqylap, bilip otyr. Biz jýyrda ǵana batys óńirinde bolyp, saılaýshylarymyzben kezdestik. Sonda aıtylǵan problemalardyń barlyǵy búgingi Joldaýda kóterilip jatqanyna qatty qýanyp otyrmyn. Máselen, týrıstik klasterdi kóterýde qandaı máselelerdi qaýzaý kerek, qandaı suraqtardyń tóńireginde jumys isteý kerektigine Memleket basshysy jan-jaqty toqtaldy. Men Prezıdent Joldaýyndaǵy kóp máselelerdiń ishinen halyqty áleýmettik qoldaý tetikterin erekshe atap óter edim. Onyń ishinde kólik qatynasyna qatysty máseleler kóterildi. Jańaózen qalasynda saılaýshylar Mańǵystaý óńirine jetý, temir jolmen qatynaý qıyndyǵyn, áýe qatynasynyń baǵasy shekten tys qymbat ekenin aıtqan bolatyn. Búgin Prezıdentimiz osy máselelerdi kóterdi», - dedi Nurlan Dýlatbekov Parlamenttiń birlesken otyrysynan keıin tilshilerdiń saýaldaryna jaýap bere otyryp.
Májilis depýtatynyń aıtýyna qaraǵanda, Prezıdent kelesi jyly Uly Abaıdyń 175 jyldyǵyn toı retinde atap ótip qana qoımaı, aqyn shyǵarmalaryn basqa qyrynan uǵynýǵa shaqyryp otyr.
«Bul máseleler tóńireginde Parlamenttiń aldynda úlken mindetter tur. Prezıdent saılaýaldy baǵdarlamasyn tolyǵymen júzege asyrýǵa bekinip otyr. Parlament osy rette kóptegen zańdarǵa ózgerister engizýi tıis», - dedi májilismen.
Eske sala ketsek, búgin QR Prezıdenti Qasym-Jomart Toqaev Qazaqstan halqyna Joldaýyn jarııalady.