Nurlan Baıjigituly Qazaqstanda Oraza qaı kúnnen bastalatynyn túsindirdi

ASTANA. KAZINFORM – Belgili dintanýshy, teolog Nurlan qajy Baıjigituly bıylǵy Ramazan aıynyń bastalýyna qatysty túsinik berdi.

Buǵan deıin Qazaqstan musylmandar dinı basqarmasy 19 aqpandy Ramazan aıynyń alǵashqy kúni dep jarııalaǵan bolatyn. Osyǵan sáıkes, 18 aqpan kúni keshke quptan namazynan keıin taraýyq namazy oqylady.

– Keıbir arab memleketteri aıdy kórý dástúrine saı búgin keshke taraýyq namazyn oqyp, erteń Orazanyń alǵashqy kúni dep jarııalap jatyr. Ókinishke qaraı, keıbir azamattar sol elderge nemese áleýmettik jelilerdegi aqparattarǵa eliktep, orazany erterek bastaýǵa nıet bildirip jatyr, – dedi dintanýshy.

Teologtyń aıtýynsha, oraza 19 aqpan kúni respýblıka aýmaǵynda bastalady. Basqa memleketterdiń aı kórýi nemese jarııalaǵan kúnderi Qazaqstan úshin negiz bolmaıdy. Sondyqtan 18 aqpan keshinde taraýyq namazy oqylyp, 19 aqpan kúni orazanyń alǵashqy kúni bolady.

Eske sala keteıik, bıyl Ramazan aıy 19 aqpanda bastalady. Osyǵan oraı Qazaqstan musylmandary dinı basqarmasy elimizdiń qalalary men aýyldaryna arnalǵan Ramazan aıynyń Oraza kestesin jarııalaǵan edi.

Sonymen qatar belgili dintanýshy, teolog Nurlan qajy Baıjigituly Vashıngtonda AQSh prezıdenti Donald Tramptyń qatysýymen ótetin dástúrli qaıyrymdylyq is-sharaǵa bardy.