Nurlan Baıbazarov: Jyl sońyna deıin 4,7 mlrd dollardyń 239 jobasy iske qosylady
ASTANA. KAZINFORM – Jyl sońyna deıin 4,7 mlrd dollardyń 239 jobasy iske qosylady. Bul týraly QR Prezıdenti janyndaǵy Sheteldik ınvestorlar keńesiniń 36-shy plenarlyq otyrysynda Premer-Mınıstrdiń orynbasary – Ulttyq ekonomıka mınıstri Nurlan Baıbazarov aıtty.
«Jalpyulttyq pýl jobalary iske asyrylyp jatyr. Jyl sońyna deıin 4,7 mlrd dollar somasyna 239 jobany iske qosý josparlanǵan. Sondaı-aq, pılottyq rejımde ekonomıkanyń basym salalaryndaǵy ınvestıtsııalyq jobalar úshin Fast Track júıesi nemese „jasyl dáliz“ jumys isteıdi. Onyń artyqshylyǵy ınvestordyń barlyq qajetti rásimderdi nebári 5 kúnde jedeldetilgen jáne jeńildetilgen túrde ótýi bolady», — dedi ol.
Onyń atap ótýinshe, ekonomıkanyń basym salalarynda joǵary qaıta bólý klasterlerin qurýdy qamtamasyz etý úshin Úkimet munaı jáne gaz hımııasy, mashına jasaý, metallýrgııa, agroónerkásiptik keshen sııaqty salalarda 17 iri jobanyń tizbesin qalyptastyrdy.
«Olardy iske asyrý 26 myńnan jumys ornyn qura otyryp, shamamen 30 mlrd dollar tartýǵa, daıyn ónim eksportyn shamamen 12,2 mlrd dollarǵa arttyrýǵa jáne ımportqa táýeldilikti 3 mlrd dollardan astamǵa tómendetýge múmkindik beredi. Joǵaryda atalǵan jobalardy iske asyrý memlekettik qoldaýdyń barlyq qajetti sharalaryn kórsete otyryp, Úkimettiń erekshe baqylaýyna alyndy. Búgingi tańda „tolyq aıaqtalǵan“ MJÁ-niń aýqymdy jobalaryn qalyptastyrý úshin halyqaralyq qarjy uıymdarymen tájirıbeli sheteldik konsýltanttar men tehnıkalyq sarapshylardy tartý máselesi pysyqtalýda. Bul josparlaý sapasyn jáne qajetti qarjyny tartýdy kepildendirýdi qamtamasyz etedi», — dedi Nurlan Baıbazarov.
Buǵan deıin ár óńirde ákimderdiń basshylyǵymen Óńirlik ınvestıtsııalyq shtabtar qurylatynyn jazǵan edik.
