Nurlan Baıbazarov respýblıkalyq bıýdjettiń 300 mlrd teńgesin ońtaılandyrmaq

ASTANA. KAZINFORM – Premer-Mınıstrdiń orynbasary – Ulttyq ekonomıka mınıstri Nurlan Baıbazarov bıylǵy respýblıkalyq bıýdjettiń 300 mlrd teńgesin ońtaılandyrmaq.

Búgin Úkimet otyrysynda Premer-Mınıstr Oljas Bektenov Ulttyq ekonomıka mınıstrinen: «Bıýdjettiń ónimsiz shyǵystaryn qysqartý jáne ekonomıkany yryqtandyrý bóliginde qandaı jumystar atqaryldy?», - dep suraǵan edi. 

Nurlan Baıbazarovtyń aıtýynsha, bıýdjet shyǵystaryn ońtaılandyrý maqsatynda Qarjy mınıstrligi tıisti bıýdjettik baǵdarlamalar ákimshilerimen birlesip, respýblıkalyq bıýdjet shyǵystaryn anyqtaý maqsatynda osy jyldyń shyǵystaryna qosymsha tekserý júrgizdi. Júrgizilgen taldaý nátıjeleri boıynsha, sonymen qatar 2023 jylǵy respýblıkalyq bıýdjettiń atqarylǵanyn eskere otyryp, kelesindeı sharalardy usynylady:

Birinshi – memlekettik organdardyń aǵymdaǵy ákimshilik shyǵystaryn qysqartý. Bul issaparlar shyǵyndary, forýmdar ótkizý, zertteýler júrgizý jáne baǵy basqalary; 

Ekinshi – birinshi kezekti mańyzy joq jobalar men is-sharalardy, onyń ishinde olardyń oryndalýy merzimderin, mysaly ákimshilik ǵımarattar salý, aǵymdaǵy jóndeý, kúrdeli shyǵyndar jáne taǵy basqa is-sharalardy qaıtadan qaraý;

Úshinshi – memlekettik qoldaýdyń ónimdiligi tómen is-sharalar boıynsha shyǵystardy azaıtý;

Tórtinshi – jobalardy, onyń ishinde jekelegen is-sharalardy qarjylandyrý jáne iske asyrý sharttaryn ózgertý esebinen shyǵystardy ońtaılandyrý.

«Osy taldaý nátıjeleri boıynsha ońtaılandyrýǵa 300 mlrd teńgeden astam qarajat usynylyp otyr. Eger siz maquldaǵan jaǵdaıda bul qarajat Memleket basshysynyń tapsyrmalaryn, sondaı-aq ekonomıkanyń basym sektorlaryn qarjylandyrý úshin respýblıkalyq bıýdjetti naýryz aıynda túzetý jolymen Úkimet rezervine shoǵyrlandyrý usynylady», - dedi Ulttyq ekonomıka mınıstri. 

Osy oraıda Premer-Mınıstr qabyldanyp otyrǵan sharalardy qoldaıtyndyǵyn atap ótti.