Nurlan Baıbazarov elimizge 190 mlrd ıen ne sebepti tartylatynyn túsindirdi

ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Nurlan Baıbazarov Qazaqstan Azııa Damý Bankinen, Azııa Infraqurylymdyq Bankinen, sondaı-aq Halyqaralyq Qaıta qurý jáne Damý bankinen jalpy somasy 200 mlrd ıenge jýyq qarajatty ne sebepti tartyp jatqanyn túsindirdi.

«Munyń bári ınvestıtsııalar, ıaǵnı óńirlerdi damytýǵa jáne ınvestıtsııalyq jobalardy qarjylandyrýǵa arnalǵan. Bul ınvestıtsııalar ekonomıkanyń áleýetin ósirýge áser etedi. Ekonomıkanyń ósimin qamtamasyz etsek, bıýdjettiń kiristeri artatyny túsinikti. Árıne, eger memlekettik qaryz bolsa, ol memleket esebinen óteledi. Jaqynda halyqaralyq kredıt agenttikteri bizdiń reıtıngterdi rastady, olardyń keıbiri elimizdiń deńgeıin kóterdi. Sondyqtan Qazaqstan jalpy halyqaralyq ınvestorlardyń aldynda senimdi seriktes retinde tanyldy. Biz ınvestıtsııa tartýǵa múddelimiz. Atap aıtqanda, osy másele boıynsha eshqandaı qaýipti kórip turǵanym joq. Qarajat der kezinde qaıtarylady», — dedi N. Baıbazarov Senattyń jalpy otyrysynan keıin tilshiler suraǵyna jaýap bere otyryp.

Sonymen qatar, ol 200 mlrd ıenge jýyq qarajat ne sebepti ıen valıýtasynda alynatynyna túsinik berdi.

«Qazir ıen eń arzan valıýtalardyń biri jáne ony alý sharttary tıimdi, ıaǵnı tómen paıyzben uzaq merzimge alýǵa bolady», — dedi mınıstr.

Budan bólek, vedomstvo basshysy Islam damý banki Qazaqstannyń sý salasyna $1,15 mlrd ınvestıtsııa salatynyn eske saldy.

Eske salsaq, jaqynda Parlament Májilisiniń qaraýyna úsh zań jobasy kelip tústi.

Bul rette Qazaqstan Halyqaralyq Qaıta Qurý jáne Damý bankinen 84,9 mlrd ıen tartady.

Munymen qosa, Qazaqstan Azııa Damý Bankinen jáne Azııa Infraqurylymdyq Investıtsııalar Bankinen jalpy 105 mlrd ıen alady.

Bıyl qarasha aıynda Fitch Qazaqstannyń táýelsiz kredıttik reıtıngin rastady.