Nurlan Áýesbaev teledebatta qandaı máselelerdi kóterdi

ASTANA. QazAqparat – Jalpyulttyq sotsıal-demokratııalyq partııasy Astana qalalyq fılıaly tóraǵasy Nurlan Áýesbaev Parlamentte qandaı máselelerdi qolǵa alatynyn aıtty, dep habarlaıdy QazAqparat tilshisi.

«Birinshi kezekte tegin medıtsınalyq qyzmet, bilim, azamattardyń yńǵaıly baspanasyn qamtamasyz etý, zeınetaqy, jalaqy, járdemaqylardy kóterý, jumyspen qamtý, bank salasyndaǵy joǵary nesıelerdiń bárin tómendetý máseleleri tur», - dedi N. Áýesbaev teledebatta.

Partııa ókili bul máselelerdiń sheshilmeýiniń sebebi – jemqorlyq dep atap ótti.

Sondaı-aq ol kezek kúttirmeıtin úsh máseleni atady.

«Qazaqstandyqtardyń ómir sapasy standarttaryn engizý, ol ǵylymı turǵyda Eýropa elderinen alynǵan. Eldegi eń áljýaz, az qamtylǵan adamnyń ózi naqty standarttarǵa saı bolýy kerek. Ol qazirgideı tutynýshylyq sebet qana emes, dári-dármekpen, demalyspen qamtylýy kerek, tamaqtanýy, kıimi, basqasy da bar. Bul standarttyń saqtalýyna barlyq mınıstrlikti mindetteý kerek. Ekinshiden, olıgarhııalyq júıeden arylý kerek. Qazaqstanda bári bolsa da, elimiz kedeı turady. Óıtkeni baqylaý joq, baılyqty memleketke qaıtarý kerek», - dedi ol.

Sońǵy kezeńde partııa ókilderi halyqqa úndeý jasap, daýys berýge shaqyrdy.

«Elimiz aýyr kezeńdi ótkerýde. Qymbatshylyq kúnnen-kúnge sharyqtaý shegine jetip barady. Sondyqtan qazir aıtylǵan barlyq máselelerdi qorytyndylap, qosymsha taǵy aıtarym – Parlamentke tergeý jumystaryn júrgizý kerek. Óıtkeni Parlamenttiń únsiz júrgeniniń saldarynan jemqorlyq jaılap aldy. Biz barlyq máseleni baqylaýda ustaýymyz kerek, ol halyqtyq baqylaý bolýy kerek. Sonda ǵana jaqsy dárejelerge jetemiz. Biz úzdiksiz jemqorlyqpen kúresemiz. Eldiń baılyǵyn memleketke qaıtarýǵa tyrysamyz», - dedi N. Áýesbaev.

Eske sala keteıik, «Qazaqstan» ulttyq arnasynyń tikeleı efırinde Májilis saılaýyna qatysatyn 7 saıası partııa ókilderiniń arasynda ótken pikirsaıys birer saǵat buryn aıaqtaldy. Oǵan «Amanat» partııasynan Elnur Beısenbaev, «Aýyl» halyqtyq demokratııalyq partııasynan Jıgýlı Daırabaev, Respublica partııasynan Syrymbek Taý, Qazaqstan Halyq partııasynan Ashat Asylbekov, «Baıtaq» jasyldar partııasynan Azamathan Ámirtaev, «Aq jol» demokratııalyq partııasynan Berik Dúısembınov, al Jalpyulttyq sotsıal-demokratııalyq partııasynan Nurlan Áýesbaev qatysty.