Nurlan Álimjanov Astanada Baıqońyr aýdanynyń ákimi boldy
ASTANA. KAZINFORM – Talǵat Rahmanberdiniń basqa qyzmetke aýysýyna baılanysty Baıqońyr aýdanynyń ákimi bolyp Nurlan Álimjanov taǵaıyndaldy. Bul týraly qala ákimdiginiń baspasóz qyzmeti habarlady.
Taǵaıyndaý Qazaqstan Respýblıkasy Prezıdenti Ákimshiliginiń jáne qalalyq máslıhat depýtattarynyń kelisimimen júzege asty.
Nurlan Álimjanov memlekettik qyzmettegi eńbek jolyn 2012 jyly bastaǵan.
2012 jyldyń tamyzynan 2015 jyldyń shildesine deıin Qaraǵandy qalasynyń Oktıabr aýdany ákimi apparatynda jáne Balqash qalasy ákimi apparatynda túrli qyzmetter atqardy.
2015 jyldyń shildesinen 2020 jyldyń maýsymyna deıin ortalyq jáne jergilikti atqarýshy organdarda basshylyq qyzmetterde boldy.
2020 jyldyń maýsymynan 2022 jyldyń shildesine deıin Qaraǵandy oblysynyń memlekettik satyp alý basqarmasyn basqardy. Al 2022 jyldyń shildesinen 2023 jyldyń sáýirine deıin Qaraǵandy oblysynyń kásipkerlik basqarmasynyń basshysy qyzmetin atqardy.
2023 jyldyń sáýirinen tamyzyna deıin Astana qalasy ákimi apparaty basshysynyń orynbasary boldy.
2023 jylǵy 4 qyrkúıekte Astana qalasynyń Aktıvter jáne memlekettik satyp alý basqarmasynyń basshysy bolyp taǵaıyndalǵan.
