Nurlan Álimjanov rejıserlikke bet burmaq
ASTANA. QazAqparat - Esimi elimizge tanymal akter ári ánshi Nurlan Álimjanov aldaǵy ýaqytta salaýatty ómir saltyn nasıhattyn fılm túsirýdi josparlap otyr. Bul jaıynda ol búgin QR Densaýlyq saqtaý mınıstri Eljan Birtanovpen kezdesýden keıin aıtty, dep habarlaıdy QazAqparat tilshisi.
«Qazaqstannyń «Densaýlyq elshi» retinde taǵaıyndap jatyr, qýantarlyq jaǵdaı. Muny aq halatty abzal jandardyń óner jolyndaǵy bizderge senim artqany dep bilemiz jáne bul senimdi aqtaýǵa tyrysamyz. Óıtkeni, «Densaýlyq elshi» degen jáı ǵana marapat alý, bos sóz emes. Ony ispen dáledeýimiz kerek. Ulttyń bolashaǵy - densaýlyq. Sondyqtan densaýlyqqa basa nazar aýdarýymyz qajet dep esepteımiz», - dedi mınıstrdiń qolynan «Densaýlyq elshisi» ataǵyn alǵan akter.
Sonymen qatar ol BAQ ókilderiniń aldaǵy ýaqyttaǵy josparyna qatysty saýalyna da jaýap berdi.
«Akter bolǵanymmen bolashaqta kınorejısser, prodıýser bolý armanym bar. Aldaǵy ýaqytta sport týraly fılm túsirmek oıymda bar. Fılm - bul úlken ıdeologııa. Fılm arqyly mıllıondaǵan aýdıtorııa tartýǵa bolady», - dedi ol.
Nurlan Álijmanov bala kezinen sportpen turaqty aınalysyp kele jatqanyn da atap ótti.
«Meniń ustanymym - barlyq ýaqytta da dene-bitimimdi saqtaý, ádemi kóriný. Qazirgi ýaqytta apta saıyn 2-3 ret sportmen aınalysamyn. Bala kezimde bokspen aınalyssam, stýdent kezimde taekvondamen shuǵyldandym. Al qazir júzýmen, fıtnespen, júgirýmen shuǵyldanamyn», - dedi akter.
Aıta keteıik, búgin QR Densaýlyq saqtaý mınıstri Eljan Birtanov Qaırat Nurtas, Qaraqat Ábildına, Ibragım Eskendir jáne Nurlan Álimjanovpen kezdesip, olarǵa elimizdegi eń alǵashqy «Densaýlyq elshisi» ataǵyn tabystaǵan bolatyn.
