Nurlan Álimjan eńbek jolyn jumysshy bolyp bastaǵan qoǵam qaıratkerlerin dáripteýge shaqyrdy
NUR-SULTAN. QazAqparat – Májilis depýtaty Nurlan Álimjan eńbek jolyn jumysshy retinde bastaǵan qoǵam qaıratkerlerin dáripteýge shaqyryp, Bilim jáne ǵylym mınıstri Ashat Aımaǵambetovke depýtattyq saýal joldady, dep habarlaıdy QazAqparat tilshisi.
«Elbasynyń qamqorlyǵynyń arqasynda jastar 2017 jyldan beri kolledjderde tegin bilim alý múmkindigine ıe boldy. Sonyń ishinde qanshama aýyl balasy mamandyq alyp, búginde úılerge sý, jaryq, jylý berý qyzmetterin atqarýda. Elektrondyq úkimet portalyndaǵy aqparatqa súıensek, elimizde 759 kolledj bar eken. Olardy kásiporyndar men mekemelerge senimgerlikke berý máselesi 5 jyldan beri kóterilip keledi. Byltyr Premer-Mınıstr Asqar Uzaqbaıuly «Іri kompanııalar, ekonomıka kóshbasshylary 150-ge jýyq kolledjdi senimgerlik basqarýǵa ala alady, al ýnıversıtetter 50-ge jýyq kolledjdi qabyldaýǵa daıyn. Bul bastamalarǵa qoldaý kórsetip, seriktestik tetikterin ázirleýimiz kerek» degen edi. Árıne, bul basqarý oqý baǵdarlamasyn eńbek naryǵyna sáıkestendirip, stýdentterdiń jańa tehnologııamen praktıkadan ótýine múmkindik beredi», - dedi Nurlan Álimjan Parlament Májilisiniń jalpy otyrysynda.
Onyń aıtýynsha, búgingi másele – senimgerlikke kirmegen kolledjder jaıy. Óıtkeni, el aralaǵanda bir kolledjdiń bazasy keremet, al ekinshisinde Keńes dáýirinen qalǵan eski traktor men apparattar tur.
«Osyǵan oraı Bilim jáne ǵylym mınıstriniń qaraýyna kelesi usynystardy engizemin: BAQ-ta eńbek jolyn jumysshy mamandyǵynan bastaǵan qoǵam qaıratkerleri, belgili azamattardy dáripteýdi qolǵa alyp, osy mamandyqtardy yntalandyratyn qaǵaz nusqada jáne elektrondy formatta arnaıy jýrnal, gazetti bir júıege qoıý kerek. Halyqaralyq standartqa saı baǵdarlama ázirlep, kolledjderdiń materıaldyq-tehnıkalyq bazasyn jańartqan durys. Kolledjdi úzdik bitirgen stýdenttiń ýnıversıtetke emtıhansyz qabyldanyp, grant arqyly bilim alý múmkindigin qarastyr kerek», - dedi depýtat.
