Nurlan Ábdirov saılaý komıssııalarynyń jumysyna qatysty mańyzdy talaptardy atady
ASTANA. KAZINFORM — Ortalyq saılaý komıssııasynyń tóraǵasy Nurlan Ábdirov, sondaı-aq OSK hatshysy Shavhat Ótemisov ınspektsııalyq saparmen Mańǵystaý oblysynda bolyp, Quryltaı saılaýyna daıyndyq barysymen tanysty.
Jumys sapary aıasynda olar Jańaózen jáne Aqtaý qalalaryndaǵy saılaý ýchaskelerinde bolyp, memlekettik organdardyń ókilderimen, aýmaqtyq jáne ýchaskelik saılaý komıssııalarynyń tóraǵalarymen kezdesti.
Sapardyń birinshi kúninde OSK tóraǵasy Jańaózen qalasyndaǵy № 89 jáne № 283 saılaý ýchaskelerine bardy. Nurlan Ábdirov atalǵan ýchaskelerde azamattardyń saılaý quqyqtaryn júzege asyrýy úshin jasalǵan jaǵdaılarǵa tekserý júrgizdi. Sonymen qatar aqparattyq buryshtardyń jabdyqtalýy, qajetti materıaldardyń bolýy jáne olardyń qoljetimdiligi tekserildi.
— Saılaý komıssııalary óz qyzmetinde azamattardyń derbes derekterin qorǵaýǵa erekshe mán beredi. Bul tásildiń elementteriniń biri — arnaıy trafarettiń paıdalanylýy. Ol birneshe saılaý naýqanynan beri qoldanylyp keledi. Trafararetti saılaýshylardyń jalpy tizimine qoıǵan kezde, azamat tek ózine qatysty derbes derekterdi kóredi jáne tıisti baǵanǵa qol qoıady. Bul jańashyldyq saılaýshylardyń derekterin qorǵaýdy qamtamasyz etý turǵysynan mańyzdy dep sanaımyn, — dep atap ótti Nurlan Ábdirov.
Kelesi kúni Nurlan Ábdirov bastaǵan jumys toby birqatar saılaý ýchaskeleriniń, onyń ishinde bıylǵy jyly ashylǵan saılaý ýchaskeleriniń jumysymen tanysty. Saılaý ýchaskelerinde azamattardyń barlyq sanattary úshin qajetti jaǵdaılardyń jasalýyna erekshe nazar aýdaryldy. Atap aıtqanda, baspaldaqpen ózdiginen kóterile almaıtyn múgedektigi bar azamattarǵa arnalǵan arnaıy ornatylǵan shynjyr tabandy kótergishtiń jumysy kórsetildi.
Nurlan Ábdirovtiń tóraǵalyǵymen Mańǵystaý oblysynyń memlekettik organdary ókilderiniń qatysýymen keńes ótti. Kezdesý barysynda óńirdiń Quryltaı depýtattaryn saılaýǵa daıyndyǵyna qatysty máseleler qaraldy. Keńeske oblys ákimdiginiń, prokýratýranyń, ishki ister organdarynyń, tótenshe jaǵdaılar departamentiniń, áleýmettik qorǵaý salasynyń jáne basqa da memlekettik organdardyń ókilderi qatysty. Keńeske qatysýshylar atqarylǵan jumystar men saılaýǵa daıyndyq aıasynda qabyldanyp jatqan sharalar týraly baıandady.
OSK tóraǵasy memlekettik organdar men saılaý komıssııalarynyń úılesimdi jumysy saılaýdy sapaly uıymdastyrý men ótkizýdiń mańyzdy sharty ekenin atap ótti. Onyń aıtýynsha, saılaýǵa daıyndyq jumystary júıeli túrde júrgizilip, zańnama talaptary qatań saqtalýy jáne árbir saılaýshynyń quqyqtaryn qamtamasyz etýge baǵyttalýy tıis.
Aqtaý qalasynyń aýmaqtyq jáne ýchaskelik saılaý komıssııalarynyń tóraǵalarymen ótken kezdesýde Nurlan Ábdirov daýys berýge daıyndyq jáne ony ótkizý kezeńindegi olardyń negizgi mindetterine toqtaldy. Ol saılaý zańnamasynyń talaptaryn qatań saqtaýǵa, saılaý protsesiniń barlyq qatysýshylary úshin teń jaǵdaı jasaýǵa, saılaý ýchaskeleriniń jumysyn durys uıymdastyrýǵa, saılaý qujattaryn belgilengen tártippen resimdeýge, baıqaýshylarmen jáne buqaralyq aqparat quraldarynyń ókilderimen ózara is-qımyl jasaý máselelerine erekshe nazar aýdardy.
Keńeske qatysýshylar azamattardyń bir bóligi demalysta bolatyn jazǵy kezeńniń ereksheligine de nazar aýdardy. Osyǵan baılanysty Ortalyq saılaý komıssııasynyń tóraǵasy saılaýshylar arasynda daýys berý kezinde esepten shyǵarý kýálikterin paıdalaný tártibi jóninde keń kólemde túsindirý jumystaryn jalǵastyrýdy tapsyrdy.
— Ýchaskelik saılaý komıssııalarynyń múshelerin ashyq, ári úılesimdi jumys isteýge, saılaý protsesiniń ashyqtyǵyn qamtamasyz etýge jáne azamattardyń saılaýǵa qatysý konstıtýtsııalyq quqyǵyn iske asyrýyna jan-jaqty járdemdesýge shaqyramyn. Árqaısyńyzdyń kásibı ári jaýapty jumysyńyz azamattardyń saılaý quqyqtarynyń saqtalýyna, saılaýdyń zańdylyq jáne jarııalylyq qaǵıdattarynyń qamtamasyz etilýine tikeleı baılanysty, — dep qorytyndylady Nurlan Ábdirov.
Budan buryn áleýmettanýshylar qazaqstandyqtardyń saılaý belsendiligi artqanyn anyqtady.
