Nurlan Ábdirov OSK-nyń strategııalyq bolashaǵyn atady
Ortalyq saılaý komıssııasynyń tóraǵasy Nurlan Ábdirov OSK-niń strategııalyq bolashaǵyn atady, dep habarlaıdy Kazinform.
«2022 jyly OSK janynan qurylǵan dıalog alańdary, atap aıtsaq Sarapshylyq keńes pen Jas saılaýshylar klýby qarqyndy damyp keledi. Múgedektigi bar adamdardyń saılaý quqyqtaryn qamtamasyz etý jónindegi jumys tobynyń qyzmeti qaıta formattaldy. Sarapshylyq keńes aıasynda Qazaqstandaǵy eldik saılaýlardy halyqaralyq baıqaýdyń qorytyndy esepterin keń jáne ashyq talqylaý dástúri qalyptasýda. Sonymen qatar OSK músheleriniń saılaý naýqandary barysynda jáne saılaýaralyq kezeńderde óńirdegi jurtshylyqpen, jastarmen turaqty jáne tikeleı, ashyq dıalog formaty qurylýda», — dedi Nurlan Ábdirov «Konstıtýtsııalyq reforma jáne saılaý júıesi» halyqaralyq ǵylymı tájirıbelik konferentsııasy barysynda.
Osy oraıda ol Ortalyq saılaý komıssııasynyń strategııalyq bolashaǵyna toqtaldy.
«Qazirgi mindetimiz — ótken joldy baǵamdaý, sonymen birge el Prezıdentiniń júzege asyrylyp jatqan saıası reformasyn eskere otyryp, OSK-niń, sondaı-aq búkil saılaý organdary júıesiniń damyý bolashaǵyn belgileýge tyrysý. 2022 jylǵy Konstıtýtsııalyq reforma saıası júıeniń búkil konfıgýrasyn ózgertip, saılaý keńistigine trasformatsııalyq áser ete otyryp, qoǵamdyq qatynastardyń jańa dáýirine jol saldy. Saılaý protsesteri arqyly azamattardyń memlekettik basqarýǵa qatysýyn keńeıtýge de basa nazar aýdarylýda. Búgingi tańda jalpy álemdik trendterdi eskere otyryp, ózimizdiń bolashaqqa baǵdarlamamyzdy aıqyndaýymyz qajet», — dedi OSK tóraǵasy.
