Nurlan Ábdirov OCK tóraǵasy bolyp qaıta taǵaıyndaldy
ASTANA. KAZINFORM — Nurlan Ábdirov Ortalyq saılaý komıssııasy tóraǵasy bolyp taǵaıyndaldy.
Tıisti Jarlyqqa Prezıdent Qasym-Jomart Toqaev qol qoıdy.
— Memleket basshysynyń Jarlyǵymen Nurlan Májıtuly Ábdirov Qazaqstan Respýblıkasy Ortalyq saılaý komıssııasynyń Tóraǵasy laýazymyna taǵaıyndaldy, — dep habarlamada.
Nurlan Ábdirov 1961 jylǵy 12 qańtarda týǵan.
KSRO ІІM Qaraǵandy joǵary mektebin, KSRO ІІM Búkilodaqtyq ǵylymı-zertteý ınstıtýtynyń kúndizgi adıýnktýrasyn (Máskeý q.), Dj.Marshall atyndaǵy Qaýipsizdik máselelerin zerdeleý jónindegi Eýropalyq ortalyqta basshylyq quramnyń 4 aılyq kýrstaryn (Germanııa) bitirgen.
Zańger-quqyqtanýshy. Zań ǵylymdarynyń doktory, professor.
09.1982 – 06.1997 jj. - ІІM Qaraǵandy joǵary mektebinde oqytýshylyq qyzmet atqardy.
06.1997 – 05.2000 jj. – Qazaqstan Respýblıkasynyń Esirtkini baqylaý jónindegi memlekettik komıssııasynyń hatshysy.
05.2000 – 09.2002 jj. – Qazaqstan Respýblıkasy Nashaqorlyqqa jáne esirtki bıznesine qarsy kúres agenttigi tóraǵasynyń orynbasary, Qazaqstan Respýblıkasy Ádilet mınıstrliginiń Nashaqorlyqqa jáne esirtki bıznesine qarsy kúres komıteti tóraǵasynyń orynbasary.
09.2002 – 06.2005 jj. – Qaýipsizdik keńesi Hatshylyǵynyń memlekettik ınspektory, Qaýipsizdik keńesi Hatshylyǵy Qoǵamdyq jáne ekologııalyq qaýipsizdik bóliminiń meńgerýshisi, Qazaqstan Respýblıkasy Qaýipsizdik keńesi Hatshylyǵy meńgerýshisiniń orynbasary.
06.2005 – 09.2009 jj. – Qazaqstan Respýblıkasy Qaýipsizdik keńesi hatshysynyń orynbasary – Qaýipsizdik keńesi Hatshylyǵynyń meńgerýshisi.
09.2009 – 08.2020 jj. – Qazaqstan Respýblıkasy Parlamenti Májilisiniń tórtinshi, besinshi, altynshy saılanymdarynyń depýtaty, Zańnama jáne sot-quqyqtyq reforma komıtetiniń tóraǵasy.
08.2020 – 09.2020 jj. – Qazaqstan Respýblıkasy Parlamenti Senatynyń depýtaty.
09.2020 – 01.2022 jj. Qazaqstan Respýblıkasy Parlamenti Senaty tóraǵasynyń orynbasary.
Qazaqstan Respýblıkasy Prezıdentiniń 2022 jylǵy 25 qańtardaǵy № 784 Jarlyǵymen Qazaqstan Respýblıkasy Ortalyq saılaý komıssııasynyń tóraǵasy bolyp taǵaıyndaldy.
Eske salaıyq, buǵan deıin Prezıdenttiń ishki saıasat máseleleri jónindegi kómekshisi taǵaıyndalǵanyn habarlaǵan edik.
