Nurlan Ábdirov Quryltaı saılaýyna belsendi qatysýǵa shaqyrdy
ASTANA. KAZINFORM — QR Ortalyq saılaý komıssııasynyń tóraǵasy Nurlan Ábdirov saılaýshylarǵa úndeý jasady.
— 2026 jylǵy 23 tamyzda Qazaqstan Respýblıkasynyń tarıhynda tuńǵysh ret Quryltaı depýtattarynyń saılaýy ótedi. Sizderdi elimizdiń odan ári damýyndaǵy jańa kezeńdi aıqyndaıtyn tarıhı oqıǵaǵa qatysyp, azamattyq jaýapkershilik tanytýǵa jáne konstıtýtsııalyq quqyqtaryńyzdy júzege asyrýǵa shaqyramyz, — dedi Nurlan Ábdirov.
Onyń aıtýynsha, azamattardyń Quryltaı depýtattaryn saılaýǵa qatysý quqyǵyn qamtamasyz etýdiń negizgi kepili — saılaýshylar tizimine engizilýi.
OSK málimetinshe, saılaýshylar tizimderi azamattardyń turaqty tirkelgen mekenjaıy boıynsha jasalady. Al ýaqytsha tirkeýde turǵan azamattar jergilikti atqarýshy organǵa ótinish berý arqyly ýaqytsha ornalasqan jeri boıynsha daýys bere alady.
Sondaı-aq saılaý ýchaskeleriniń shekaralary men ýchaskelik saılaý komıssııalarynyń ornalasqan jerleri týraly aqparat 2026 jylǵy 16 shildege deıin jarııalanady.
— Árbir azamat óziniń tirkelgen jeri boıynsha jergilikti atqarýshy organǵa júginip, saılaý ýchaskesin jáne saılaýshylar tizimine engizilgenin teksere alady. Eger tizimde bolmasa, ákimdikke tıisti ótinish berý quqyǵy bar, — dedi OSK tóraǵasy.
Budan bólek, jazǵy demalys maýsymy eskerilip, azamattarǵa esepten shyǵarý kýáligin alý arqyly ózge eldi mekende daýys berý múmkindigi qarastyrylǵany aıtyldy.
Ortalyq saılaý komıssııasynyń habarlaýynsha, 2026 jylǵy 7 tamyzdan bastap azamattar ózderiniń saılaý ýchaskelerinde saılaýshylar tizimindegi derekterin teksere alady. Qajet bolǵan jaǵdaıda málimetterdi naqtylaý nemese ózgeris engizý úshin ýchaskelik saılaý komıssııasyna ótinish berýge bolady.
Buǵan deıin Quryltaı saılaýyna daıyndyqtyń kúntizbelik jospary tanystyrylǵanyn jazǵan edik.
