Nurlan Ábdirov: Jer qoınaýy týraly kodeks Májiliste qyzý talqylanýda

ASTANA. QazAqparat - «Jer qoınaýy jáne jer qoınaýyn paıdalaný týraly» Qazaqstan Respýblıkasy kodeksiniń jobasy ekonomıkanyń mańyzdy sektorynda júıeli tapsyrmalardy sheshýi tıis. Májilis depýtaty, «Nur Otan» partııasy janyndaǵy Quqyqtyq keńestiń tóraǵasy Nurlan Ábdirov jańa kodeks talqylanǵan búgingi jıynda osyndaı pikir bildirdi, dep habarlaıdy «QazAqparat» HAA tilshisi.

«Parlament Májilisinde qazir qarastyrylyp jatqan mańyzdy zańdardyń biri - Jer qoınaýy týraly kodeks. Onyń mańyzdylyǵy týrasynda Elbasy da naqty aıtyp, tıesili tapsyrmalardy berdi. Májiliste ótken talqylaý kezinde qyzý áńgimeler de boldy. Ártúrli oı-pikirler aıtylyp jatyr. Biraq, negizgi baǵyt - el úshin óte mańyzdy kodeks dep baǵa berýimizde. Sebebi, bul zań jobasy depýtattar korpýsy men osy sala mamandarynyń qoldaýyna ıe. Elimizdiń aldynda júıeli tapsyrmalar bar. Eń birinshi kezekte - geobarlaý. Kóptegen sala boıynsha jańa kodeks Qazaqstan ekonomıkasynyń osynaý mańyzdy sektorynda júıeli tapsyrmalardy sheshýi kerek», - dedi Nurlan Ábdirov «Nur Otan» partııasynyń janyndaǵy Quqyqtyq keńestiń keńeıtilgen otyrysynda.

Onyń aıtýynsha, jańa kodekstiń ekonomıkalyq paıdasymen birge, atalǵan salada áleýmettik suraqtardyń da baryn eskergen abzal.

«Jańa kodekstiń engizilýi boıynsha mańyzdy tustardy talqylaımyz. Onyń engizilýi elimizge zor paıda ákeler degen senimdemin. «Nur Otan» partııasynyń janyndaǵy Quqyqtyq keńestiń otyrysynda da osy máseleni talqylap, pysyqtap, ótkir suraqtar bolsa, olardy sheship, jaýaptaryn tyńdaý - maqsatymyzdyń biri», - dep atap ótti Ábdirov.