Nurlan Ábdirov: OSK músheleri eshqandaı partııada bolmaýy tıis
Ortalyq saılaý komıssııasynyń tóraǵasy Prezıdenttiń saılaý júıesin jetildirý týraly Joldaýyna da pikir bildirdi.
«Keshe Prezıdent aıtqan majorıtarlyq júıe kóp nárseni ózgertedi. Árbir óńirde majorıtarlyq júıe qaıtadan qalyptasýy kerek. Qazir Májiliste proportsıonaldyq pen majorıtarlyq júıelerdiń qosyndysy paıdalanylsa, máslıhattarda tolyq majorıtarlyq bolady. Kóp uzamaı tıisti ózgerister Konstıtýtsııaǵa da, basqa zańdarǵa da daıyndalyp engiziledi», - dedi N. Ábdirov L. N. Gýmılev atyndaǵy Eýrazııa ulttyq ýnıversıtetinde ótken kezdesýde.
Sonymen birge N. Ábdirov máslıhattardyń qyzmeti men olardy qarjylandyrý máselesi ózekti bolyp otyrǵanyn atap ótti.
«Máslıhat tóraǵasy degen jańa laýazym engizilip otyr. Bul bastama da bir kezderi kóterilgen bolatyn. Alaıda ol kezde másele tolyq sheshilmedi», - dedi ol.
Sonymen qatar, Nurlan Ábdirov Memleket basshysynyń ortalyq saılaý komıssııasynyń tóraǵalary men músheleri partııadan mindetti túrde shyǵýy týraly erejeni zańnamaǵa engizý tapsyrmasyn atap ótti.
«Ortalyq saılaý komıssııasynyń músheleri – jeti adambyz, onyń úsheýi Prezıdent Jarlyǵymen taǵaıyndalady, ekeýin Májilis, ekeýin – Senat taǵaıyndaıdy. Osy jeteýdiń bári de partııadan tys bolý kerek dep keshe Prezıdentimiz aıtyp ketti», - dedi Nurlan Ábdirov.
«Mysaly ózim 25 qańtarda Prezıdent taǵaıyndaǵannan keıin erteńine aryz jazyp, Nur Otan partııasynan shyqqan bolatynmyn. Maǵan bul sheshim ońaı bolǵan joq. Óıtkeni zańda ondaı norma joq – qaı partııada bolsań da ortalyq saılaý komıssııasynyń múshesi bolyp júre beresiń. Biraq men osy qyzmetke kelgennen keıin partııada bolmaýym kerek dep jeke ózim sheshim qabyldadym. Prezıdenttiń qabyldaýynda bolǵanda osy sheshimimdi aıttym, durys dedi», - dedi OSK tóraǵasy.
Aıta keteıik, Nurlan Ábdirov Qyzylorda, Atyraý, Aqtóbe, Aqmola oblystaryna jumys saparymen bardy jáne óńir turǵyndarymen birqatar kezdesýler ótkizgen.
