Nurlan Ábdirov Ortalyq saılaý komıssııasynyń basty mindetin atady

ASTANA. QazAqparat – QR Ortalyq saılaý komıssııasynyń músheleri óńirlik saılaý ýchaskeleriniń aldaǵy naýqanǵa daıyndyǵyn tekserip jatyr. Bul týraly atalǵan komıssııanyń tóraǵasy Nurlan Ábdirov aıtty, dep habarlaıdy QazAqparat tilshisi.

«Saılaý komıssııalaryna ádistemelik kómek kórsetý jáne daýys berý kúnine daıyndyǵyna kóz jetizý úshin saılaý ýchaskelerine barý maqsatynda 28 qazannan Ortalyq saılaý komıssııasynyń músheleri men apparattyń óńirlerge saparlary bastalyp ketti. Men jáne meniń áriptesterim ázirshe 12 óńirge baryp úlgerdi. 17 qarashaǵa deıin biz barlyq óńirdi aralaýdy josparlap otyrmyz. Bizdiń basty mindetimiz - saılaý organdarynyń barlyq saılaý ınfraqurylymynyń 2022 jylǵy 20 qarashaǵa belgilengen kezekten tys prezıdent saılaýyn ótkizýge 100 paıyz daıyndyǵyn qamtamasyz etý», - dedi ol búgin komıssııa otyrysynda.

OSK tóraǵasy ótken aptanyń sońynda ınspektsııalyq saparmen Pavlodar men Aqmola oblystaryna, sol oblystardyń shaǵyn qalalary men aýyldarynda ornalasqan saılaý ýchaskeleriniń jumysymen tanysqanyn aıtty.

«Ókiletti memlekettik organdar men saılaý komıssııalary músheleriniń óńirlerde saılaýshylar tizimderi boıynsha júrgizip jatqan jumystary, saılaýdy uıymdastyrý, materıaldyq-tehnıkalyq qamtamasyz etý, múgedektigi bar azamattar úshin saılaý ýchaskeleriniń fızıkalyq qoljetimdiligi úshin qajetti jaǵdaılar jasaý, saılaý bıýlletenderin kúzetý jáne ýaqytyly jetkizý, sonymen qatar basqa da máseleler boıynsha baıandamalaryn tyńdadym», - dedi Nurlan Ábdirov.

Ashyq kózderden alynǵan foto