Nurlan Ábdirov: Memlekette bes áleýmettik bastamany iske asyratyn qarajat bar

ASTANA. QazAqparat - Parlament Májilisiniń depýtaty Nurlan Ábdirov Memleket basshysy Nursultan Nazarbaevtyń jarııalaǵan bes áleýmettik bastamasy týraly pikirin bildirdi, dep habarlaıdy «QazAqparat» HAA tilshisi.

«11 mln sharshy metr turǵyn úı (bir jylda - avt.) salyndy. Prezıdent óz sózinde bul aýqymnyń jetpeıtinin atap ótti. Birneshe jyl buryn jylyna 6 mln sharshy metr salynsa, bul aıtarlyqtaı keremet kórsetkish retinde sanalatyn. Búgingi kúni 11 mln sharshy metr máseleni sheshpeı tur. Sondyqtan, bankterdiń qoljetimdi nesıeleri álbette, kóbeıedi. Adamdardyń basym bóliginde «armandy jaqyndatyp, ony shynaıylyqqa aınaldyrýǵa» múmkindik týady», - dedi májilismen.

Depýattyń paıymdaýynsha, gaz qubyrlarynyń salynýynyń da mańyzy zor.

«Jasyratyny joq, áleýmettik jelilerden-aq Astananyń aspanyn qanshalyqty tútin basyp ketkenin kórip otyramyz. Ýaqyty kelgende munyń bári ótken kúnniń bir parasy bolyp qalatyn kez týar. Sebebi, qatty otyndardyń aýaǵa taralýy alty esege azaısa, bul birshama máseleniń sheshiletininen habar berip turǵan joq pa!? Bizdiń Sizdermen birge elordada jaǵdaıymyz jaqsara túsedi. Gaz qubyrlary boıynsha aıtylǵan jumys 2,5 mıllıon adamnyń ómirin qamtıdy. Muny da eskereıik», - dedi ol.

Nurlan Ábdirov sonymen qatar, zańger retinde bir máselege nazar aýdaratynyn tilge tıek etti.

«Elbasy búgin óz sózin aıaqtar tusta Konstıtýtsııa boıynsha biz bárimiz birlesip áleýmettik memleket quryp jatqanymyzdy atap ótti. Belgilengen bes áleýmettik bastama - eń aldymen Qazaqstan áleýmettik memlekettiń irgesin qalaýǵa baǵyttalǵan. Ekinshiden, depýtattarǵa tıisti zańdardy qabyldap, tezirek osy prezıdenttik áleýmettik bastamalardy júzege asyrý mindetteldi. Ózderińiz estigendeı, Prezıdent «báriniń eseptelip otyrǵanyn» erekshe atap ótti. Demek, bul áleýmettik bastamalardy júzege asyrý maqsatynda naqty qarjy memlekette bar. Osy jumystardy iske asyrýǵa Prezıdent bıznesti atsalysýǵa shaqyrdy», - dep túıdi Nurlan Ábdirov.