Nurlan Ábdirov Qaraǵandy oblysyndaǵy jańadan saılanǵan aýyl ákimderimen kezdesti

NUR-SULTAN. QazAqparat - Parlament Senaty Tóraǵasynyń orynbasary Nurlan Ábdirov Qaraǵandy oblysynda saparda boldy. Tóraǵa orynbasary jańadan saılanǵan aýyl ákimderimen, sondaı-aq Ulytaý jáne Jańaarqa aýdandary máslıhattarynyń depýtattarymen kezdesti, dep habarlaıdy QazAqparat.

Nurlan Ábdirov júzdesýde ótken saılaýdaǵy jergilikti bılik organdarynyń ókilettigi men derbestigin keńeıtýdegi mańyzdylyǵyn atap ótti.

«Elimizde aýyl ákimderin saılaý aıaqtaldy. Osylaısha, biz jergilikti atqarýshy organdardyń derbestigin nyǵaıtýǵa baǵyttalǵan saılaý protsesiniń birinshi jáne mańyzdy kezeńderinen tabysty óttik. Bul saıası reformany alǵash ret elimiz Prezıdenti Qasym-Jomart Toqaev bıylǵy qańtar aıynda Parlament palatalarynyń birlesken otyrysynda jarııa etkeni belgili. Memleket basshysy sol kezde azamattardyń sheshim qabyldaý protsesine yqpalyn kúsheıtý úshin osyndaı serpin berýdiń mańyzdylyǵyn atap ótken bolatyn. Osyǵan baılanysty jańadan saılanǵan ákimderge úlken jaýapkershilik júkteledi» , - dedi Nurlan Ábdirov.

Senat Tóraǵasynyń orynbasary bul tapsyrmany iske asyrý úshin depýtattar aýqymdy zańnamalyq jumysty jedel túrde júrgizgenin eske saldy. Atap aıtqanda, jergilikti ózin-ózi basqarý bıýdjetin nyǵaıtý úshin salyqtar men tólemderdiń keıbir túrleri: biryńǵaı jer salyǵy, jer ýchaskelerin paıdalanǵany úshin tólem, jer ýchaskelerin satýdan túsetin túsimder, jer ýchaskelerin jaldaý quqyǵyn satý tólemi tórtinshi deńgeıge berildi. Nurlan Ábdirov bul jańalyqtar aýyldyq, aýdandyq jáne qalalyq bıliktiń derbestigin ulǵaıtýǵa yqpal etetinin aıtty.

Palata Tóraǵasynyń orynbasary jergilikti halyqty tolǵandyratyn ózekti máselelerdi talqylaý jáne sheshý men qoldanystaǵy zańnamanyń tıimdiligin jaqsartý úshin Senat pen máslıhat depýtattarynyń birlesken jumysyn kúsheıtýdiń mańyzdylyǵyn atap ótti.

Senat Tóraǵasynyń orynbasary kezdesýlerge qatysqan quqyq qorǵaý organdarynyń ókilderine arnaǵan sózinde Memleket basshysynyń bastamasymen ázirlengen, elimizdiń quqyq qorǵaý jáne sot júıelerin reformalaýǵa baǵyttalǵan zańdardy qabyldaý depýtattar qyzmetiniń mańyzdy nátıjeleriniń biri bolǵanyn atap ótti.

Tóraǵa orynbasary sapar barysynda sondaı-aq óńirdegi aýyl eńbekkerlerimen elimizdiń mal sharýashylyǵyn qoldaý máselelerin de talqylady jáne oblystyń aýyl sharýashylyǵy sektorynyń damý problemalarymen tanysty. Jaqynda Qaraǵandy oblysynda bolǵan dala órtiniń saldarymen kúres jáne óńirdiń ondaǵan zardap shekken sharýa qojalyqtaryna keltirilgen zalaldy óteý máseleleri kóterildi. Nurlan Ábdirov keltirilgen zalaldy baǵalaý jáne zardap shekken azamattarǵa ótemaqy tóleý jónindegi jumystardy jedeldetýdiń mańyzdylyǵyn atap ótti.