Nurqoja Qaıpanov: Jaýapkershiliktiń salmaǵy áser etti
ASTANA. KAZINFORM — Qazaqstandyq balýan Nurqoja Qaıpanov kúresten elordada ótken álem chempıonatynyń aqtyq synynda beldesip, kúmis júldeger atandy.
Otandasymyz jarystan keıin QR Ulttyq olımpıadalyq komıteti baspasóz qyzmetine bergen suhbatynda sheshýshi beldesýge baǵa berip, qoldaý kórsetken jankúıerlerge alǵys bildirdi.
- Búgingi beldesý men úshin óte qıyn boldy. Negizi tolyq daıyn boldym. Alaıda ózime shamadan tys jaýapkershilik júktep alǵan sııaqtymyn. Ásirese komandalastarymnyń jeńilisinen keıin aýyrtpalyq túskendeı boldy. Endi qazaq halqyn qýantqym keldi. Biraq búgingi fınalda Reseı balýany basym tústi. Bozkilemge shyqqan sátte qatty qıyn boldy. Jaýapkershiliktiń salmaǵy áser etti me, áıteýir aıaq-qolym istemeı qaldy. Degenmen bul jeńilisten keıin toqtap qalmaımyz, ári qaraı eńbek etemiz. Aldymyzda álem chempıonaty men Olımpıada oıyndary kútip tur. Aldaǵy ýaqytta da osy salmaq dárejesinde óner kórsetemin. Tórt jarys qatarynan osy salmaqta kúrestim. Sondyqtan áli de ózimdi dáleldep, bıik belesterdi baǵyndyrýym kerek. Óz elimizde, jankúıerlerimizdiń aldynda kúresý men úshin úlken baqyt. Osydan jeti jyl buryn ótken álem chempıonatynda da kúmis júldeger atanǵan edim. Bul joly da qazaq halqynyń erekshe qoldaýyn sezindim. Sol úshin barsha jankúıerge alǵys bildiremin, - dedi Qaıpanov.
Qazaqstan balýandary kúresten álem chempıonatyn bes medalmen qorytyndylaǵanyn jazǵan edik.
