Núrken Ábdirovti eske túsirýge arnalǵan týrnırdiń alǵashqy jeńimpazdary anyqtaldy
ASTANA. QazAqparat - Qaraǵandyda kúres túrlerinen Keńes Odaǵynyń Batyry, ushqysh Núrken Ábdirovti eske túsirýge arnalǵan respýblıkalyq týrnırdiń ekinshi kúni 6 salmaq dárejesinde jeńimpazdar men júldegerler belgili boldy, dep habarlaıdy QazAqparat.
Jarysty birinshi bolyp bastaǵan grek-rım kúresiniń sheberleri arasynan 55 keli salmaqta almatylyq Qorlan Jaqansha jeńimpaz atandy. Fınalda almatylyq balýan soltústikqazaqstandyq Baýyrjan Sadýaqasovtan basym tústi.
63 keli salmaqtyń bas júldesin aqtóbelik Meırambek Aınaǵulov jeńip aldy. Álem chempıonatynyń kúmis júldegeri buǵan deıin 59 kelide baq synap kelgen bolatyn. Aqtóbelik balýan jańa salmaqta qarsylastarynyń barlyǵyn bet qaratpaı jeńdi. Fınalda ol shyǵysqazaqstandyq Qudaıbergen Tursynovty tize búktirdi.
72 kelide álem chempıonatynyń taǵy bir kúmis júldegeri Demeý Jadraevtyń mereıi ústem boldy. Almaty oblysynyń balýany fınalda jergilikti balýan Ibragım Magomedovti utty. Tartysty ótken beldesý 2:1 esebimen aıaqtaldy.
Sondaı-aq, 82 kelide jarys jeńimpazy bolyp, almatylyq Danııal Gadjıev tanyldy. 97 kelide Janarbek Kabdolov (SKO), asa aýyr salmaqta Nurmahan Tynálıev jeńis tuǵyryna kóterildi.
Endi búgin jarysty erkin kúres balýandary bastaıdy. Sondaı-aq, grek-rım kúresi balýandary arasynda 4 salmaqtyń fınaldyq beldesýleri ótedi.
Foto www.wrestling.kz
