Nurqanat Jaqypbaı: Eń baqytty sát – shákirtterimniń menen asyp túsetin kezi
ASTANA. KAZINFORM – Qazaqstannyń halyq ártisi, rejısser Nurqanat Jaqypbaı qazirgi qazaq teatrynyń damýy, jastar teatrynyń qalyptasýy jáne shákirt tárbıesi týraly pikir bildirdi.
Óner ıesi búginde óńirlerde jastar teatrlarynyń ashyla bastaǵanyn qazaq teatry úshin mańyzdy úrdis dep baǵalaıdy. Bul týraly ol Jibek Joly telearnasynyń «Búgin. Live» baǵdarlamasynda aıtty.
Nurqanat Jaqypbaıdyń aıtýynsha, Astanada Jastar teatryn qurý ıdeıasy da kútpegen jerden kelgen. Ol kezde rejısserdiń shákirtteri oqýyn aıaqtap, árqaısysy ár jaqqa ketkeli turǵan. Astana tarapynan usynys túsken soń, shákirtterin jınap, jańa teatrdy birge qurýǵa sheshim qabyldaǵan.
– Astanadan usynys tústi, jastar teatryn ashý jaıly. Men ony da kútken joqpyn. Balalarymdy qımaı júrgenmin. Jan-jaqqa tarap ketedi-aý, birge júrse durys bolatyn edi dep oıladym. Sátin saldy. Jınaldyq ta, Astanaǵa shyqtyq. Qazir óńirlerde jastar teatrlary ashyla bastady. Buryn ondaı bolmaǵan. Bir qyzyǵy, olar bizden kórdi de, «bizde de bolady eken ǵoı» degen oı keldi. Qazir búkil oblysta jastar teatry ashyldy. Budan asqan baqyt bar ma? – dedi rejısser.
Óner ıesi úshin teatrdyń basty nátıjesi tek qoıylymnyń kórkemdik deńgeıimen ólshenbeıdi.
Onyń aıtýynsha, spektakl kórermenniń ómirine áser etip, qıyn sátte demeý bola alsa, negizgi mıssııanyń oryndalǵany.
Nurqanat Jaqypbaı birneshe jyl burynǵy bir oqıǵany erekshe yqylaspen eske aldy.
– Bir kúni spektaklden keıin kabınetke kelip, spektakl qandaı boldy dep qaıta-qaıta oılanyp otyrdym. Sosyn syrttan bireý kelip, sizdi bir qyz kútip tur dedi. Jaqyndap kelsem, kózi óte muńly qyz jylap tur eken. Iyǵyma basyn qoıyp jylady. «Aǵa, siz búgin meni eń qıyn jolǵa ketip bara jatqan jerimnen qutqardyńyz. Sizge rahmet, ólimnen qutqaryp qaldyńyz» dedi. Rahmetin aıtyp, basyn kóterip ketti. Ónerdiń qudireti osy. Bul oqıǵa máńgi esimde qaldy. Bir adamǵa septigiń tıdi. Keshe marapat kezinde týra osyny esime aldym, – dedi ol.
Rejısser shyǵarmashylyq jolynda shákirt tárbıesine erekshe mán bergenin aıtty. Dáýren Sherǵazın, Ádil Ahmetov, Aınur Rahımova sekildi shákirtteriniń ónerde óz ornyn qalyptastyrǵanyn atap ótti.
– Shákirt ustazynan asyp túsken sát – eń baqytty sát. Bir demalyp qalasyń. Ómirdiń máni sol. Dáýren Sherǵazın, Ádil Ahmetov, Aınur Rahımova sekildi shákirtterim ónerde óz ornyn qalyptastyrdy. Shákirtterimmen qarym-qatynasym kásibı sheńbermen ǵana shektelmegen. Jas teatr ujymymen birge júrgen alǵashqy kezeńderde turmystyq qıyndyqtardy da birge bólistik, – dedi Nurqanat Jaqypbaı.
Nurqanat Jaqypbaıdyń aıtýynsha, óner jolynda eń mańyzdysy – únemi alǵa umtylý. Ol ózine maqsat qoıǵannan keıin joldaǵy qıyndyqtarǵa qaramaı, kelesi shyǵarmasyn oılap, izdenisti jalǵastyra beretinin jetkizdi.
Jaqynda Memleket basshysynyń qolynan Qazaqstannyń halyq ártisi ataǵyn alǵan rejısser bul marapatty kútpegenin de aıtty.
Onyń sózinshe, ol joǵary marapatty jeke óziniń ǵana emes, birge eńbek etken shákirtteriniń eńbegine berilgen baǵa dep qabyldaıdy.
– Men jalpy mundaı marapat kútken joq edim, bilgen de joqpyn. Bilmeı keldim. Prezıdent kelip marapattap suraǵanda, árıne, yńǵaısyz sezindim. Bir qýanyshym, tolqýym aralas boldy. Sodan keıin esimdi jııa bastadym. Bul jalǵyz men úshin emes, ózim basqaryp júrgen shákirtterimniń eńbeginiń arqasynda qol jetken dúnıe dep esepteımin, – dedi rejısser.
Nurqanat Jaqypbaıdyń aıtýynsha, búginde teatrǵa kelip, qoıylymnan keıin akterler men rejısserlerdi kútip turatyn jastar kóbeıgen. Ol muny kórermenniń ónerge degen qyzyǵýshylyǵy men qurmetiniń artyp kele jatqanynyń belgisi dep baǵalady.
Aıta keteıik, buǵan deıin, teatr maýsymynyń qorytyndysyn jazǵan edik. Bıyl 2,8 mln-nan astam kórermen spektakl tamashalady.
