Nurqanat Serikbaev Tbılısıdegi Grand Slam týrnırinde altyn medal jeńip aldy
ASTANA. KAZINFORM – Grýzııanyń Tbılısı qalasynda ótip jatqan dzıýdodan Grand Slam serııasyndaǵy týrnırde Nurqanat Serikbaev joǵary sheberlik tanytyp, 66 kelige deıingi salmaq dárejesinde jeńimpaz atandy.
Fınalda Ázerbaıjan ókili Týran Baıramovpen ótken beldesýde otandasymyz minez pen jeńiske degen jigerin tanytyp, altyn júldeni qanjyǵasyna baılady. Bul – onyń jańa salmaqtaǵy alǵashqy júldesi.
Sondaı-aq 60 kelige deıingi salmaqta Talǵat Orynbasar qola medal oljalap, komandanyń jalpy nátıjesine mańyzdy úles qosty.
Aıta keteıik, osy aıdyń basynda 21 jastaǵy Ádilet Almat Aýstrııada ótken Grand Prix kezeńinde altyn medal ıelengen edi. 59 eldiń sportshylary qatysqan básekede ol 6 beldesý ótkizip, fınalda senimdi jeńiske jetti.
Qazirgi tańda otandyq dzıýdo júıeli túrde damyp keledi. Ulttyq qurama áıgili jattyqtyrýshy Entsıo Gamba jetekshiligimen jańartylǵan ádisteme boıynsha daıyndalyp jatyr. Jattyqtyrýshylar quramynda keńesshi Robert Mshvıdobadze, Stefano Frassınellı jáne otandyq mamandar bar. Qurama sapyna 46 er jáne 35 áıel dzıýdoshy engen.
Qazaqstanda dzıýdony damytýdyń keshendi júıesi qalyptasqan: jyl saıyn túrli jas sanattary boıynsha eldiń 5 resmı chempıonaty jáne 66 respýblıkalyq týrnır ótkiziledi. Bul básekelestik ortany kúsheıtip, joǵary deńgeıdegi sportshylardy júıeli daıarlaýǵa múmkindik beredi.
Tóreshiler korpýsyn damytýǵa da erekshe kóńil bólinýde. Elde halyqaralyq deńgeıdegi 11 tóreshi jáne Azııa qurlyǵy sanatyndaǵy 50 tóreshi jumys isteıdi. Halyqaralyq dzıýdo federatsııasy qurylymynda Jandos Qııanov pen Denıs Amelın tabysty eńbek etip, IJF World Judo Tour serııasynyń iri týrnırlerinde tórelik etýge tartylady.
Bul jetistikter bıyl qyrkúıek aıynda Japonııada ótetin jazǵy Azııa oıyndary qarsańynda erekshe mańyzǵa ıe. Olar ulttyq quramanyń áleýetine degen senimdi arttyryp, aldaǵy daıyndyq jumystaryna joǵary qarqyn beredi.
