Nurqanat Raıs bokstan álem chempıonatynda moldovalyq qarsylasyn súrindirdi

BELGRAD. QazAqparat - Serbııa astanasy Belgrad qalasynda ótip jatqan bokstan álem chempıonatynda búgin, 30 qazanda Nurqanat Raıs ekinshi jekpe-jegin sátti ótkizdi, dep habarlaıdy QazAqparat tilshisi.

Nurqanat 1/16 fınalda 75 keli salmaqta moldovalyq Vlad Gavrılıýkpen qolǵap túıistirdi. Sharshy alań tórinde qazaqstandyq boksshy senimdi oıyn kórsetti.

Qarsylasyna soqqyny kóbirek jumsady. Nátıjesinde tórt tóreshini onyń jeńisine qoldaý bildirse, bireýi moldovalyq sportshynyń basym túskenin kórsetti.

Osylaısha Nurqanat qarsylasyna 4:1 esebimen súrindirdi. Sol arqyly 1/8 fınalǵa joldama aldy.

Sondaı-aq, búgin kúndizgi sessııada Temirtas Júsipov (48 keli) serbııalyq Omer Ametovıchpen qolǵap túıistirse, Nurbek Oralbaı (80 keli) brazılııalyq Isaıas Fılomen sharshy alańǵa shyǵady.

Al keshki sessııada Sanatáli Tóltaev (63,5 keli) moldovalyq Vasılıı Chebotarmen kezdesedi.

Eske salsaq, budan buryn Mahmýd Sabyrjan (54 keli), Samatáli Tóltaev (60 keli), Aslanbek Shymbergenov (71 keli), Aıbek Oralbaı (92 keli) jarysty jalǵastyrýǵa múmkindik aldy.

Álem chempıonatyna el quramasynda 13 boksshy bardy.

Olardyń arasynan Bek Nurmaǵambet (86 keli) pen Nurlan Saparbaı (92 keli) qarsylastaryna jol berdi.

Foto: olympic.kz