Nurymbet Saqtaǵanov: Topqaıyń aýyly aýyz sýmen qamtylady
ÓSKEMEN. KAZINFORM — Shyǵys Qazaqstan oblysynyń ákimi Nurymbet Saqtaǵanov bul týraly Katonqaraǵaı aýdany turǵyndarymen kezdesý barysynda málimdedi.
Búginde aýdanda 26 eldi meken sýmen qamtamasyz etilgen. Halyqty sýmen qamtý qyzmetterine qoljetimdiligi — 98,8%.
Desede, Topqaıyń aýylyndaǵy sý qubyry jelilerin qaıta jańartý jobasynyń qurylysy 4 jyldan astam ýaqytqa sozylyp ketti. Basty sebep — merdiger josyqsyz bolyp shyqty.
— Óńir turǵyndaryn alańdatatyn árbir másele bizdiń baqylaýymyzda. Topqaıyń aýylyndaǵy jobaǵa jaýapty merdiger óz mindetine salǵyrt qarap, jaýapkershilik tanytpady. Qazirgi tańda jańa merdiger jumysty jalǵastyryp jatyr. Alaıda, istiń oryndalmaǵanyn tek kompanııaǵa jaýyp, aýdan basshylyǵyna jaýapkershilikten jaltarýǵa bolmaıdy, — dep basa aıtty Nurymbet Saqtaǵanov.
Aımaq basshysy halyqpen kezdesýden keıin arnaıy Topqaıyń aýylyna baryp, qurylys jumystaryn tekserdi. Qurylys alańynda aýyl turǵyndary da boldy. Olar sol jerde tolǵandyrǵan suraqtaryn tikeleı merdigerge qoıdy.
— Danııar Bekqazyuly (Katonqaraǵaı aýdanynyń ákimi), merdigermen birlesip bul jumysty 1 qarashaǵa deıin tolyq aıaqtaýdy tapsyramyn. Іsteı almaǵan jaǵdaıda, tıisti sheshim qabyldaımyz, — dedi oblys ákimi.