Nurymbet Saqtaǵanov: ShQO ekonomıkasy «Qaztsınkke» táýeldi kúıge túsken
ASTANA. KAZINFORM — Shyǵys Qazaqstan oblysynyń ákimi Nurymbet Saqtaǵanov «Jibek Joly» arnasyndaǵy «Ýáde» baǵdarlamasyna bergen suhbatynda óńir ekonomıkasy birtarapty kúıge túskenin aıtty.
— Ekonomıkany ártaraptandyrýdyń ásirese bizdiń oblysta máni erekshe dep oılaımyn. Óıtkeni ol óndirisi damyǵan óńir. Ekonomıkasynyń 42 paıyzyn ónerkásip salasy beredi. Saýdanyń úlesi 7 paıyzdyń ústinde ǵana. Onyń artynda kóptegen jumys orny, salyq túsimi tur. Al respýblıkalyq bıýdjetke donor bolyp otyrǵan Almatyda ónerkásip kerisinshe qala ekonomıkasynyń 4 paıyzyn ǵana, saýda salasy 14 paıyzyn beredi. Saýdanyń úlesi shaǵyn jáne orta kásipkerlikti damytqanda artady degen sóz, — deıdi ákim.
Aımaq basshysy óńir ekonomıkasyn «Qaztsınk» kompanııasyna táýeldilikten aryltýdyń jospary ázirlenip jatqanyn da aıtty.
— Ekonomıkanyń 42 paıyzy ónerkásipke tıesili desek, onyń ishindegi qaıta óńdeýdiń 70 paıyzyn «Qaztsınk» berip otyr. Demek, bizdiń oblys ekonomıkasynyń damýy jalǵyz «Qaztsınk» kásipornyna táýeldi bolyp otyr. Ony bıylǵy kórsetkishter kórsetti. Jyldyń alǵashqy 3-4 aıynda «Qaztsınk» óziniń bir tsehyn jóndeýge jaýyp, qaıta iske qosty. Sol kezde ónerkásip kólemi 20 paıyzǵa deıin tómendep ketti. Sáıkesinshe oblystyń búkil kórsetkishteri, jalpy óńirlik ónim deńgeıi de tómendep ketti. Qazir «Qaztsınktiń» ónerkásip kólemi 1-2 paıyz ósim qosyp keledi. Osylaısha oblystyń ekonomıkasy da sondaı dınamıka kórsetip otyr. Biz bulaı bir ǵana kásiporynǵa qarap otyrmaýymyz kerek. Oǵan balama retinde basqa salalardy damytýymyz kerek. Onyń ishinde, álbette, týrızm, aýyl sharýashylyǵy, energetıka jáne basqa salalar bar. Qazir 2026-2030 jyldarǵa deıingi strategııalyq damý josparyn jasap jatyrmyz. Oblystyń turaqty damýyna qaı salalar negiz bolatyny sol strategııada kórinis tabady, — dedi Nurymbet Saqtaǵanov.
Buǵan deıin ShQO-da ekologııalyq talaptardy buzǵan asfalt zaýytynyń jumysy toqtatylýy múmkin ekenin jazǵan edik.