Nurıla Turysbekova: Azııa oıyndaryna qatysý elimizdiń konkýr quramasy úshin óte mańyzdy
TOKIO. KAZINFORM — Japonııada ótip jatqan HH jazǵy Azııa oıyndarynyń at sportynan konkýr básekesi búgin Tokıonyń JRA Equestrian Park kesheninde resmı bastaldy. Baıraqty dodada el namysyn qorǵap jatqan qazaqstandyq sportshysy Nurıla Turysbekova Kazinform tilshisine quramanyń Azıadaǵa oralýynyń mańyzdylyǵy týraly aıtyp berdi.
Sportshy Qazaqstan konkýr komandasynyń araǵa 20 salyp qaıta Azııa oıyndaryna qaıta oralǵanyn eske saldy.
- Men Japonııada ótip jatqan 2026 jylǵy Azııa oıyndarynda Qazaqstan atynan óner kórsetip jatyrmyn. Qazirgi ýaqytta biz Tokıoda jarysyp jatyrmyz, óıtkeni eki sport túri — at sporty jáne sýǵa júzý — Japonııa astanasyna kóshirildi. Mundaǵy atmosfera óte qarqyndy.
Bul joly bizde óte jas komanda bar. Olardyń barlyǵy bolashaǵy zor shabandozdar,- dedi ol.
Nurıla Turysbekovanyń aıtýynsha, qazaqstandyq sportshylar minetin attar ózderine tıesili jáne olar qajetti daıyndyqtan ótken.
- Biz bir jyl boıy daıyndaldyq jáne Eýropada turdyq. Árıne, biz úzdik úshtikke kirý úshin barymyzdy salamyz, sebebi básekelestik óte qıyn, sonyń ishinde Azııa chempıondary men Olımpıada oıyndaryna qatysýshylar da bar,- dedi shabandoz.
Ol sondaı-aq Azııa oıyndarynda baq synaýdyń sportshylarǵa úlken jaýapkershilik júkteıtinin atap ótti.
- Munda jarysqa qatysyp, Qazaqstannyń namysyn qorǵaý – zor maqtanysh. Qazaqstanǵa jankúıer bolyp jatqandardyń barlyǵyna úlken alǵys aıtamyz, biz sol qoldaýdy sezinip otyrmyz. Bizge senim artqandaryńyz úshin raqmet. Biz bar kúsh-jigerimizdi salamyz,- dedi Nurıla Turysbekova.
Osyǵan deıin habarlaǵanymyzdaı, konkýrdan Qazaqstan quramasy Azııa oıyndaryndaǵy jarys jolyn bastady.
Qazaqstandyq shabandozdar 3-4 qazan kúnderi jekeleı syndada óner kórsetedi.
Eske salaıyq, Astanada konkýrdan CSI-W FEI Jumping World Cup jáne Challenge Cup fınaly tabysty ótken bolatyn.
