Nurǵısa Tilendıev atyndaǵy «Óz elim» mýzykalyq festıvaliniń jeńimpazdary 1,2 mıllıonǵa ıe boldy
ASTANA. 1 sáýir. QazAqparat - Búgin Astanada Halyq qaharmany, qazaqtyń ataqty kúıshi-sazgeri ári kompozıtory Nurǵısa Tilendıev atyndaǵy ІІІ mýzykalyq «Óz elim» festıvaliniń jeńimpazdaryn marapattaý keshi ótti.
Nurǵısa artyna ólmes máńgilik saz, án-jyryn qaldyrǵan bıik tulǵa. Qazaqtyń rýhyn kóteretin onyń shyǵarmalary qazirgi tańdaǵy talantty jastardy shabyttandyryp, elordamyzda eki kún boıy dúbirlep ótken baıqaýda elimizdiń túkpir-túkpirinen kelgen ónerli órenderdiń ǵana emes, ánsúıer jurttyń shalqyp, bir serpilýine uıytqy boldy. Atalmysh shara Astana ákimi Imanǵalı Tasmaǵambetov pen qalalyq mádenıet basqarmasynyń qoldaýymen, bıyl úshinshi ret Astana qalasynyń Memlekettik fılarmonııasynyń uıymdastyrýymen ótip otyr.
Festıval paraqtaryna kóz júgirtsek, dástúrge aınalǵan bul aıtýly óner dodasyna Qazaqstannyń barlyq óńirlerinen 80-ge jýyq kásipqoı dombyrashylar, ánshiler jáne dırıjerler qatysyp, óz ónerlerin jurtshylyqqa pash etti. Aıta ketetin bolsaq, festıval "klassıkalyq vokal", "dombyra", "dırıjer" boıynsha úsh atalymda ótti. Jas ónerpazdarǵa ózderiniń ádil baǵalaryn berip, qazylyq etkenderdiń qatarynda Bıbigúl Tólegenova, Nurǵalı Núsipjanov, Altynbek Qorazbaev, Nurjamal Úsenbaeva, Muhtar Óteýov, Seken Turysbekov, Aıtqalı Jaıymov jáne Nurǵısa Tilendıevtiń qyzy Dınara Tilendıeva boldy.
Festıval sharty boıynsha, Bas júlde úshin - 1 200 000 teńge kólemindegi aqshalaı syılyq pen Astana qalasy ákiminiń kýbogy tabystaldy. Gran-prı ıesine 800 000 teńge aqshalaı syılyq kózdelgen. Sondaı-aq birinshi oryn alǵandarǵa - 600 000 teńge, ekinshi orynǵa - 300 000 teńge, úshinshi orynǵa - 150 000 teńge aqshalaı syılyqtar berildi.
Qazylardyń sheshimimen festıvaldiń 2013 jylǵy Bas júldesi men Astana qalasy ákiminiń kýbogi elordalyq Rýslan Baımýrzın men almatylyq Aıdos Jabaǵınge buıyrdy.
