Nurǵısa Ádiletuly: Uzaq úzilisten keıin qaıta oralý ońaıǵa soqpady
NAGOıA. KAZINFORM — Qazaqstandyq sportshy Nurǵısa Ádiletuly Japonııada ótip jatqan HH jazǵy Azııa oıyndaryn qortyndylap, Kazinform tilshisine suhbat berdi.
Aýyr atlet jaraqatynan jazylyp, bir jyldyq uzilisten keıin jarys alańyna shyǵý ońaı bolmaǵanyn aıtty.
- Búgin jarys men úshin aýyr ótti. Bastapqy jospar boıynsha birden 178 kelini eńserý kerek bolǵan. Alaıda qyzdyryný kezinde ózimdi babymda sezinbedim. Sol sebepti aýyrlyqty 1 kelige azaıtty. Ókinishke qaraı, birinshi kóterý sátsiz aıaqtaldy. Osydan keıin ózimdi jınap, nátıje kórsetý kerek ekenin túsindim. Jalpy, jaraqatyma baılanysty operatsııa jasatyp, Islam oıyndarynan keıin bir jyl úzilis alyp, osyndaı iri jarysta alańǵa qaıta oralý ońaıǵa soqqan joq. Salmaq teńsheý, tamaq jáne aýa raıyna úıirlesý bar, - dedi Nurǵısa.
Sportshy búgingi qarsylasy jáne óziniń nátıjesine baǵa berdi.
- Serpe kóterýde Azııa chempıonaty jáne Azııa oıyndary rekordyn jańaladym. Negizi múmkindigim jaqsy bolatyn. Jattyǵýda 225 kelige deıin kótere aldym. Al jarys alańy múldem basqasha boldy, bar kúshimdi saldym. Irandyq qarsylasymdy jaqsy bilemin, sońǵy ret 2024 jyly ony jeńip alǵan edim. Osy joly onyń kezegi kelip, mereıi ustem boldy, - dedi ol.
Nurǵısa Ádiletuly Azıada chempıony bolýdy armandaǵanyn, sondaı-aq alda tipti de úlken belesten kórinýdi josparlap otyrǵanyn tilge tıek etti.
- Altyn medal úshin barymdy saldym. Ózimde Azıada chempıony ataǵyn qatty armandadym. Kásipqoı mansabymda Azııa jáne álem chempıonaty, sonymen qatar Islam oıyndary chempıony ataǵym bar. Sol sebepti, Azıada chempıony ataǵy men úshin aıryqsha mańyzy bar. Aldaǵy ýaqytta qateliktermen jumys istep, jaqsy nátıjelerge qol jetkize alatynyma senimdimin, - dedi sportshy.
Eske salaıyq, aýyr atlet Nurǵısa Ádiletuly erler arasynda 95 keli salmaqta el qorjynyna kúmis medal saldy.
Osyǵan deıin habarlaǵanymyzdaı, Alekseı Chýrkın aýyr atletıkadan álem rekordyn jańartyp, Azıadanyń kúmis júldegeri atanǵan bolatyn.
