Nurǵısa Ádiletuly aýyr atletıkadan álem chempıonatynyń kúmis júldegeri atandy
ASTANA. KAZINFORM — Qazaqstandyq aýyr atlet Nurǵısa Ádiletuly Qytaıdyń Nınbo qalasynda ótip jatqan álem chempıonatynyń kúmis júldegeri atandy.
Sportshy 95 kelige deıingi salmaq dárejesinde óner kórsetti. Ol julqa kóterýde 182 kelini baǵyndyrsa, serpe kóterýde 217 kelini eńserdi.
Osylaısha, qossaıys qorytyndysy boıynsha 399 keli kótergen Nurǵısa Ádiletuly álem chempıonatynyń kúmis júldesin ıelendi.
Sonymen qatar otandasymyz julqa kóterý men serpe kóterý jattyǵýlarynyń árqaısysynda kúmis medal jeńip aldy. Osylaısha, onyń qorjynynda álem chempıonatynyń eki kishi kúmis júldesi de bar.
Bolgarııalyq Karlos Nasar 415 (185+230) keli nátıjesimen altyn medal jeńip aldy. Al ırandyq Alı Alıpýr 396 (181+215) kelimen úshinshi orynǵa turaqtady.
Aıta keteıik, bul — Qazaqstan quramasynyń 2026 jylǵy álem chempıonatyndaǵy alǵashqy júldesi.
Eske salaıyq, bıyl qyrkúıek aıynda Nurǵısa Ádiletuly Aıchı jáne Nagoıada (Japonııa) ótken jazǵy Azııa oıyndarynyń kúmis júldegeri atanǵan edi. Sol jarysta otandasymyz qossaıystyń qorytyndysy boıynsha 394 (177+217) keli kótergen bolatyn.
Nurǵısa Ádiletuly buǵan deıin de álem chempıonattarynda júlde alǵan. Ol 2022 jyly Kolýmbııanyń Bogota qalasynda ótken álem birinshiliginde kúmis medal ıelense, 2024 jyly Bahreınniń Manama qalasynda álem chempıony atandy.
Eske salaıyq, buǵan deıin Qytaıdyń Nınbo qalasynda aýyr atletıkadan ótetin álem chempıonatyna kimder baratynyn jazǵanbyz.
