Nurdáýletov Ortalyq Azııa men Reseı qaýipsizdik keńesteri hatshylarynyń kezdesýine qatysty
ASTANA. KAZINFORM — Qaýipsizdik keńesteri hatshylary transulttyq qaterlerge qarsy yntymaqtastyqty talqylady, dep habarlaıdy Aqordanyń baspasóz qyzmeti.
Ǵızat Nurdáýletov «Ortalyq Azııa — Reseı» formatyndaǵy qaýipsizdik keńesteri hatshylarynyń úshinshi kezdesýine qatysty.
Reseı Federatsııasynyń Máskeý oblysynda ótken is-shara barysynda halyqaralyq jáne óńirlik qaýipsizdiktiń ózekti máseleleri, onyń ishinde terrorızm men ekstremızmge, transulttyq uıymdasqan qylmysqa, esirtki aınalymyna qarsy is-qımyl, halyqaralyq aqparattyq jáne kıberqaýipsizdikti saqtaý boıynsha pikir almasty.
— Qazaqstan Respýblıkasy Qaýipsizdik Keńesiniń hatshysy óz sózinde memleketter basshylary qabyldaǵan 2025–2027 jyldarǵa arnalǵan birlesken is-qımyl josparynyń odan ári ózara yqpaldastyqtyń naqty baǵdarlaryn aıqyndaıtyn qujat retindegi mańyzyn atap ótti, — delingen habarlamada.
Kezdesýde transulttyq qaterlerge qarsy is-qımyl salasyndaǵy yntymaqtastyqty nyǵaıtýǵa, asa mańyzdy ınfraqurylym men halyqaralyq kólik dálizderiniń qaýipsizdigin qamtamasyz etýge, sondaı-aq Aýǵanstandaǵy ahýalǵa basa nazar aýdaryldy.
Qaýipsizdik keńesiniń hatshylary óńirlik turaqtylyqtyń mańyzdy faktory retinde sý qaýipsizdigin qamtamasyz etý salasynda kúsh-jiger jumyldyrý qajet ekenine toqtaldy.
Buǵan deıin Ǵızat Nurdáýletov Máskeýde TMD Qaýipsizdik keńesteri hatshylarynyń kezdesýine qatysqanyn jazǵanbyz.
