Nurdáýlet Jarylǵapov: barlyq balýannyń armany — altyn «taıtuıaqqa» qol jetkizý

ASTANA. KAZINFORM — Qazaq kúresinen «Qazaqstan barysy — 2025» týrnıriniń basty favorıtteriniń biri Nurdáýlet Jarylǵapov Kazinform tilshisine suhbat berip, bıylǵy dodadaǵy basty maqsatymen bólisti.

Nurdáýlet Jarylǵapov eń áýeli «Qazaqstan barysy» týrnırindegi dańqty jolyn eske aldy. 

— «Qazaqstan barysy» jobasyna segizinshi ret qatysaıyn dep otyrmyn. Osyǵan deıin, 1 kúmis jáne 2 márte qola júldeni qanjyǵaladym. Osy jyly, buıyrtsa altyn «Taıtuıaqqa» qol jetkizýdi basty maqsat etip keldim. Eńbek etip, jaqsy daıyndyq jasap keldim. Árıne, barlyq balýannyń armany osy «Altyn tuıaq» ekeni daýsyz. Erteń, barlyǵymyz sol júlde jolynda aıanbaımyz, — dedi sportshy.

Sondaı-aq, balýan ne úshin laqap at retinde «Qara býra» tańdalǵanyn aıtyp berdi.

— «Qara býra» batyr týraly kishkentaı kezimnen úlken kisilerden kóp estidim. Qazaq kúresinen «Qazaqstan barysy» jobasyna qatysqan kezde, osy laqap atty yrymdap, arnaıy tańdap aldym. Shúkir, osy laqap atty tańdaǵanyma ókinbeımin. Osy ýaqytqa deıin laıyqty óner kórsetip, jaqsy jetistikterge jettim. Qazirgi ýaqytta kóp adam meni osy laqap atymmen tanıdy, — deıdi Nurdáýlet.

Aıta keteıik, sportshy Astana qalasyndaǵy «Damu Mall» saýda ortalyǵynda ótken salmaq ólsheý rásiminde tarazyda 167 keli kórsetip, týrnırdiń eń aýyr balýany atandy. 

Osyǵan deıin habarlaǵanymyzdaı, 14-shi márte alaýy tutanǵaly otyrǵan fınaldyq jarys 18 qazan kúni elorda tórindegi Jaqsylyq Úshkempirov atyndaǵy jekpe-jek saraıynda ótedi.