Mańǵystaýda 2026 jyly bekire ósirip, ýyldyryq óndiretin kásiporyn iske qosylady

ASTANA. KAZINFORM — 12 aqpan kúni Mańǵystaý oblysynyń ákimi Nurdáýlet Qılybaı Astana qalasynda shveıtsarııalyq «Swiss Choice Holding» kompanııasynyń ókilderimen kezdesti, dep habarlaıdy oblys ákimdiginiń baspasóz qyzmeti.

Olar Túpqaraǵan aýdanynda bekire balyǵyn ósirip, ýyldyryq óndirýge baǵyttalǵan «Red Pearl» balyq fermasy ınvestıtsııalyq jobasynyń júzege asyrylý barysyn talqylady.

Kaspıı teńizi jaǵalaýynda jylyna 100 tonnadan 600 tonnaǵa deıin bekire tuqymdas balyq ósirip, 100 tonna ýyldyryq óndirýdi kózdeıtin jobaǵa ákimdik tarapynan grant arqyly 56 gektar jer bólindi. Jalpy quny 5,7 mlrd teńgeni quraıtyn ınvestıtsııalyq jobanyń qurylysy 2025 jyldyń birinshi toqsanynda bastalyp, 2026 jyldary paıdalanýǵa beriledi dep josparlanýda. Birinshi kezeńde 100 tonna bekire ósirý kózdelgen.

Qurylys jumystary bastalǵan soń, 30-ǵa jýyq jańa jumys orny ashylady. Kásiporyn óz ónimderin ishki naryqqa shyǵaryp, shetelge eksporttaýdy josparlap otyr.

Nurdáýlet Qılybaı kezdesýde bul jobanyń óńirdiń áleýmettik-ekonomıkalyq damýyna qosatyn úlesin atap ótip, ákimdik tarapynan tolyq qoldaý kórsetiletinin jetkizdi.

— Memleket basshysy Qasym-Jomart Toqaev Úkimettiń keńeıtilgen otyrysynda ekonomıkany ártaraptandyrýdy jáne ınvestıtsııa tartýdy kúsheıtýdi tapsyrdy. Biz osy baǵytta óńirde túrli jobalardy júzege asyrýǵa nıettimiz. Búgin talqylaǵan bekire ósirý jáne ýyldyryq óndirý salasyndaǵy bul ınvestıtsııalyq joba óńirimiz úshin úlken mańyzǵa ıe. Biz jobanyń tabysty iske asyrylýyna zań aıasynda jan-jaqty qoldaý kórsetýge daıynbyz, — dedi Nurdáýlet Qılybaı.

Buǵan deıin habarlanǵandaı, Mańǵystaý oblysynyń ákimi Nurdáýlet Qılybaı «Jibek Joly» telearnasynyń «Ýáde» baǵdarlamasyna bergen suhbatynda Mańǵystaý óńirinde sý tuşytý zaýytyn salýǵa nıetti ınvestorlardyń usynystary kóńilden shyqpaıtynyn aıtty.