Nurbek jáne Aıbek Oralbaı Azııa chempıonatynda altynǵa talasady
ASTANA. KAZINFORM — Mońǵolııa astanasy Ulanbatyr qalasynda ótip jatqan World Boxing aıasyndaǵy 2026 jylǵy Azııa chempıonatynda búgin, 7 sáýirde jartylaı fınalda el quramasynan taǵy eki boksshy fınalǵa shyqty.
Parıj Olımpıadasynyń kúmis júldegeri, 85 kelidegi Nurbek Oralbaı ½ fınalda sharshy alańnyń ıesi Barıahaan Dorjben jolyqty.
Favorıt sanalǵan jerlesimiz alǵashqy raýndta qarsylasyn nokdaýnǵa túsirip, rıngtiń shynaıy qojaıyny kim ekenin kórsetti. Qalǵan ýaqytta da Nurbek basymdyqty qoldan shyǵarmaı, senimdi jeńisti tirkedi. Esep: 5:0.
Álem chempıony, asa aýyr salmaqtaǵy Aıbek Oralbaı ½ fınalda Túrkimenstan boksshysy Dovlet Islamovqa qarsylas atandy.
Otandasymyz barlyq raýndta aıqyn basymdyǵyn tanytyp, 5:0 esebimen jeńiske jetti.
Aıta ketsek, budan buryn Sabyrjan Aqqalyqov (75 keli) fınalǵa shyqsa, Aıgerim Sáttibaeva (48 keli) qola júldeger atandy.
Qazaqstandyq eki boksshy 14:00–de bastalatyn keshki sessııada synǵa túsedi. Aldymen 3-jupta Orazbek Asylqulov (60 keli) ózbekstandyq Ábdirahmon Mahmýdjonovpen rıngke shyqsa, 8-jupta Saǵyndyq Toǵambaı (90 keli) ózbekstandyq Halımjon Mamasolıevpen kezdesedi.
Aıta ketsek, budan buryn el quramasynan Tórehan Sabyrhan (70 keli), Baqyt Seıdish (70 keli), Nadejda Rıabets (80 keli), Dına Islambekova (80 keliden joǵary) fınalǵa joldama alsa, Valentına Halzova (70 keli), Mahmud Sabyrhan (55 keli), Ertýǵan Zeınýllınov (65 keli) qola júldeger atandy.
