Nurbek Oralbaıdyń anasy qalaı úshinshi «bapkerge» aınaldy
ASTANA. KAZINFORM – Sálden keıin otandasymyz Nurbek Oralbaı Parıj Olımpıadasynyń altynyna talasady. Kazinform tilshisi Oralbaı shańyraǵyna arnaıy baryp, taqym qysyp otyrǵan ata-anasymen, týystarymen tildesti.
Nurbek Oralbaıdyń anasy Gúlnar Shaǵataıqyzy ár jekpe-jekke deıin Nurbekke qarsylasynyń osal tusyn aıtyp, keńes beretinin aıtty.
«Nurbek maǵan «úshinshi bapkerim boldyńyz ǵoı» dep ázildep jatady. Qarsylastarynyń jekpe-jegin kórip, Nurbekke qandaı taktıka qoldaný kerek ekenin aıtyp otyramyn. Fınalǵa joldama alǵan jalǵyz qazaqstandyq boksshy bolǵandyqtan jaýapkershilik mol ekeni anyq. Balama sáttilik serik bolsyn!» - deıdi Nurbektiń anasy.
Esterińizge sala ketsek, Frantsııa astanasy Parıj qalasynda ótip jatqan XXXIII jazǵy Olımpıada oıyndary 11 tamyzda máresine jetedi.
Sanaýly sátterden keıin bokstan erler arasynda 80 keli salmaqta Nurbek Oralbaı sharshy alańǵa shyǵady.
Ol ýkraınalyq Aleksandr Hıjnıakpen altynǵa talasady.
