Nurbek Oralbaı qazaq boksshylarynan birinshi bolyp Olımpıadanyń jartylaı fınalyna shyqty

PARIJ. KAZINFORM — Frantsııa astanasy Parıj qalasynda ótip jatqan Olımpıada oıyndarynda búgin qazaq boksshylarynan birinshi bolyp sharshy alańǵa Nurbek Oralbaı shyqty. 80 keli salmaqta el namysyn qorǵap jatqan otandasymyz shırek fınalda ázerbaıjandyq Mýrad Allahberdıevpen judyryqtasty.

Nátıjesinde Nurbek Oralbaı qarsylasynan aılasyn asyryp, qazaq boksshylarynan birinshi bolyp jartylaı fınalǵa shyqty.

Aıta ketsek, Nurbek Oralbaı osyǵan deıin avstralııalyq Kallým Petersti jarys jolynan taıdyryp, shırek fınalǵa ótken bolatyn.

Esterińizge sala keteıik, keshe shırek fınalda 92 kelige deıingi salmaqta Nurbektiń egizi Aıbek Oralbaı Ázerbaıjan boksshysy Loren Berto Alfonso Domıngesten utylyp, Olımpıada oıyndaryn aıaqtaǵan edi.

Endi Astana ýaqytymen 23:30-da áıelder arasynda Karına Ibragımova shırek fınalǵa shyǵý úshin pýerto-rıkolyq Ashleın Motta Lozadamen bokstasady. Sonymen qatar, 3 tamyzǵa aýǵan túni, 00:20-da erler arasynda qazaqstandyq Sáken Bıbosynov pen ózbek Hasanboı Dýsmatov arasyndaǵy shırek fınal jekpe-jegi ótedi.

Bıbosynov pen Dýsmatov byltyr Azııa oıyndarynyń ekinshi aınalymynda bokstasyp, Dýsmatov jeńiske jetken edi. Dýsmatov – Rıo Olımpıadasynyń chempıony, al Bıbosynov – Tokıo olımpıadasynyń qola júldegeri.

Búgin qazaqstandyq sportshylar sporttyń 8 túrinen - stendtik atý, akademııalyq esý, dzıýdo, jeńil atletıka, júzý, semserlesý, boks jáne batýt gımnastıkasynan baq synap jatyr.