Nurbek Oralbaı álem kýbogynda shırek fınalda súrindi
ASTANA. KAZINFORM - Qytaıdyń Gýııan qalasynda ótip jatqan álem kýbogynyń ekinshi kúni, 16 maýsymda qazaqstandyq Nurbek Oralbaı (90 keli) shırek fınaldan asa almady.
Parıj Olımpıadasynyń kúmis júldegeri Nurbek Oralbaı keıingi ýaqytta 90 keli salmaqta synǵa túsip júr. Ol búgin shırek fınalda osy salmaqtyń kóshbasshysy, álem chempıony Týrabek Habıbýllaevpen joly túıisti.
Qos boksshy da alǵashqy raýndtan aıanyp qalmaı, aýyr soqqylarymen almasyp otyrdy. Nátıjesinde jekpe-jektiń sheshýshi raýndynda Ózbekstan boksshysy dáldik tanytyp, jeńisti óz jaǵyna burdy. Esep: 2:3.
Aıta ketsek, búgin el quramasynan Sanatáli Tóltaev (65 keli), Tımýr Nurseıitov (75 keli), Nazym Qyzaıbaı (54 keli), Laýra Esenkeldi (70 keli) jarystyń kelesi satysyna shyqsa, Tımýr Qabdeshev (55 keli) qarsylasyna ese jiberip qoıdy.
Eske salsaq, 15 maýsymda álem kýbogy ekinshi kezeńinde el quramasynan Sabyrjan Aqqalyqov (80 keli), Nurbek Oralbaı (90 keli), Serik Temirjanov (60 keli), Aıbek Oralbaı (90 keliden joǵary), Dına Islambekova (80 keliden joǵary) jarysty jalǵastyrýǵa múmkindik aldy.
Ókinishke qaraı, el quramasynan Natalıa Bogdanova (75 keli) qarsylasyna ese jiberip, jarys jolynan shyǵyp qaldy.
