Nurbek Bekenov «Semei» telearnasynyń basshysy bolyp taǵaıyndaldy
SEMEI. KAZINFORM - «Qazaqstan» RTRK» AQ Abaı oblystyq fılıalynyń dırektory qyzmetine Nurbek Bekenov taǵaıyndaldy.
Nurbek Muhametqalıuly – tájirıbeli telejýrnalıst. Memlekettik qyzmet salasynda da jumys istegen.
Shyǵys Qazaqstan oblysy Tarbaǵataı aýdanynyń Jetiaral aýylynda dúnıege kelgen. Jýrnalıstıka salasyndaǵy eńbek jolyn 2003 jyly jergilikti telearnada dıktor retinde bastaǵan.
«Qazaqstan» RTRK men 24KZ telearnasynyń Qytaıdaǵy, «Habar» agenttiginiń AQSh-taǵy menshikti tilshisi qyzmetterin atqarǵan.
Sonymen qatar Jambyl oblysynda «Aulieata-Media» holdıngi JShS bas dırektory, Shyǵys Qazaqstan oblysynda «Shyǵys-Aqparat» medıa holdıngi JShS basqarma tóraǵasy laýazymdaryn atqardy.
QR Prezıdenti baspasóz qyzmetinde jáne Ulttyq ekonomıka mınıstrliginde keńesshi bolyp eńbek etken.
Eske salsaq, buǵan deıin Erbol Sadyrdyń Abaı oblysy ákiminiń birinshi orynbasary bolyp taǵaıyndalǵanyn jazǵanbyz.